ভৱেশ কলিতাই ক’লেই নহ’ব
এজন মানুহৰ প্ৰাণৰ দাম আঢ়ৈলাখ টকা নহয়
ৰঙিয়াৰ হাজিৰা কৰা শ্ৰমিক ধৰ্মেন্দ্ৰ নাথক মাৰি পেলোৱা বিজেপি কৰ্মী এতিয়া মুক্ত বিহংগ৷ তেওঁলোকক শাস্তি দিবলৈ পুলিচেও তৎপৰতা দেখুওৱা নাই৷ এতিয়া আকৌ যুৱকজনৰ মাকক আঢ়ৈলাখ টকাৰ চেক এখন দিছেগৈ ভৱেশ কলিতাই৷
ফে’চবুকত পৰিয়ালটোটোক সহায় কৰা বুলি ফিতাহি মাৰিছে ভৱেশ কলিতাই৷ কিন্তু কথাটো হৈছে- ধৰ্মেন্দ্ৰ নাথৰ জীৱনৰ দাম মাত্ৰ আঢ়ৈলাখ টকাহে নেকি?
খৈৰাবাৰী মালধাপাৰা আশ্ৰমৰ সমীপত যিকেইটা গুণ্ডাই দীনদৰিদ্ৰ ধৰ্মেন্দ্ৰক হাত-ভৰি বান্ধি নদীত পেলাই দিছিল, সেইসকল আছিল বিজেপিৰ সদস্য৷ যাৰ বাবে আৰক্ষীয়েও গোচৰ ৰুজু কৰা নাছিল৷
পৰৱৰ্তী সময়ত প্ৰতিক্ৰিয়া সৃষ্টি হোৱাত বিজেপিয়ে হত্যাকাৰী সদস্যৰ পৰা ফালৰি কাটিছিল৷ সেই ঘটনাৰ চাৰিমাহৰ পিছত স্থানীয় বিধায়ক ভৱেশ কলিতাই দুৰ্ভগীয়া পৰিয়ালটোৰ খবৰ লোৱাৰ সময় পালে৷
কিন্তু ভৱেশ কলিতাই আঢ়ৈলাখ টকাৰ চেকেৰে ধৰ্মেন্দ্ৰৰ প্ৰাণৰ দাম দিয়াৰ সময়ত মুকলি হৈ আছে হত্যাকাৰী৷ গুণ্ডাৰ দলটোৱে ৰঙিয়াত নিৰ্ভয়ে বিচৰণ কৰি আছে৷ জামিন মুক্ত হৈ আকৌ আগৰ দৰেই কৰি আছে উপদ্ৰৱ৷ অপৰাধীক এৰি সাহায্য বিলাই ফুৰিছে ভৱেশ কলিতাই৷
সেইসকলক কঠোৰ শাস্তি বিহিবলৈ কিন্তু আৰক্ষীক ভৱেশ কলিতাই নিৰ্দেশ দিয়া নাই৷ দৰিদ্ৰতাৰ সুযোগ লৈ আঢ়ৈলাখ টকাতে কিনিবলৈ বিচাৰিছে ধৰ্মেন্দ্ৰৰ জীৱন৷
0
