ঐ চাপ্ৰি
এই চিঞৰটো মাত্ৰ এবছৰৰ আগৰ কথা৷ হাৰ্দিক পাণ্ডিয়াক দেখিলেই গেলাৰীৰ পৰা দৰ্শকে চাপ্ৰি বুলি চিঞৰে৷ সমূহীয়া চিঞৰত ৰজন জনাই যায় ষ্টেডিয়াম৷ ইতিমধ্যে হাৰ্দিকে ৰোহিত শৰ্মাৰ পৰা মুম্বাই ইণ্ডিয়ানছৰ নেতৃত্ব কাঢ়ি লৈছিল৷ সেয়ে ৰোহিতৰ অনুৰাগীয়ে হাৰ্দিকক দেখিবই নোৱাৰা হৈছিল৷
কিন্তু হাৰ্দিক পাণ্ডিয়াই জানে প্ৰত্যাৱৰ্তনৰ শৈলী৷ আজীৱন যুদ্ধৰত সৈনিকৰ দৰে যুঁজি থকা হাৰ্দিকৰ তৰোৱাল চালনাই অভ্যাস৷ সেয়ে বিজয়ৰ পথ বিচাৰি লোৱাত হাৰ্দিকৰ মুঠেও নহয় সমস্যা৷
গতিকে টি-২০ বিশ্বকাপত সেই হাৰ্দিকেই দলৰ বাবে ব্ৰহ্মাস্ত্ৰ হৈ পৰিল৷ বিজয়ী হৈ হাতত বিশ্বকাপৰ ট্ৰফী লৈ বিমান বন্দৰত নামিল হাৰ্দিক পাণ্ডিয়া৷ কেৱল মেগি খাই ক্ৰিকেটৰ অনুশীলন কৰা হাৰ্দিক আকৌ এবাৰ জিকিল৷
পিছে জীৱনেও প্ৰতাৰণা কৰিবলৈ এৰা নাই হাৰ্দিকক৷ সেয়ে বিজয়ৰ আনন্দ উপভোগৰ বাবে হাৰ্দিকৰ কাষত নাছিল মৰমী পত্নী নাটাছা৷ সম্পত্তিৰ আধা ভাগ কাঢ়ি তেতিয়ালৈ হাৰ্দিকৰ সৈতে ডিভ’ৰ্চ কৰিছিল নাটাছাই৷
জীৱনক যুদ্ধক্ষেত্ৰ বুলি ভাবি হাৰ্দিকে বাহাল ৰাখিলে সংগ্ৰাম৷ কালি যেতিয়া IPLৰ ইতিহাসৰ প্ৰথম অধিনায়ক হিচাপে হাৰ্দিকে ৫ উইকেট দখল কৰিলে তেতিয়া বহুতৰে মনত পৰিছিল চাপ্ৰি বুলি মৰা চিঞৰটোৰ কথা৷
এইবাৰ হাৰ্দিকক চাপ্ৰি বুলি কোনেও চিঞৰা নাই৷ কিন্তু হাৰ্দিকেও কাকো একোৱেই কোৱা নাই৷ নিজে নিজে বন্ধ হৈ গৈছে ষ্টেডিয়ামৰ চিঞৰ-বাখৰ৷
0
