তলে তলে চলি আছে ব্যক্তিগতকৰণৰ চেষ্টা

ব্যক্তিগতকৰণ কৰা হ’বই AGCL
প্ৰাইভেট কোম্পানীলৈ যাব গেছ গ্ৰীড
অসম গেছ কোম্পানী লিমিটেডৰ ব্যক্তিগতকৰণৰ বিষয়ে ঘুনুক-ঘানাককৈ বাতৰি ওলাইছে৷ তাৰ মাজতে AGCL প্ৰাইভেট কোম্পানীলৈ হস্তান্তৰ নিশ্চিত বুলি সদৰী কৰিছে সমৰ্থিত সূত্ৰই৷
থলুৱা ক্ষুদ্ৰ ঠিকাদাৰসকলে বছৰ বছৰ ধৰি চলাই থকা মিটাৰ ৰিডিং ব্যৱস্থাও আগজাননী নিদিয়াকৈ বন্ধ কৰি দিয়া হৈছে৷ বলীন চেতিয়া অধ্যক্ষ হৈ থকা কোম্পানীটোৱে NOVO COMPUTUNG নামৰ ব্যক্তিগত প্ৰতিষ্ঠানক সেই দায়িত্ব চমজাই দিলে৷
ফলত পাইপ গেছৰ উপভোক্তাসকলে ছমাহ-বছৰ ধৰি মাহিলী বিল লাভ কৰিব পৰা নাই৷
অসম চৰকাৰৰ একমাত্ৰ লাভ উপাৰ্জন কৰা কোম্পানীটোৰ একাংশ বিষয়াই এদেও দুদেওকৈ লোটা নিয়াৰ চেও কাৰচাজিৰে এটা এটাকৈ বিভাগ পুঁজিপতিৰ হাতত চমজাই দিছে৷
এই সন্দৰ্ভত স্থিতি স্পষ্ট কৰিবলৈ জাতীয় সংগঠনে AGCLক দিছে তিনিদিন সময়৷ তাৰ মাজতে আকৌ ব্যক্তিগতকৰণৰ সংবাদ অস্বীকাৰ কৰিছে MD গকুল চন্দ্ৰ স্বৰ্গীয়াৰীয়ে৷
তেওঁ প্ৰকাশ কৰা মতে গেছ গ্ৰীডৰ চোৱা-চিতাৰ বাবে নিবিদাৰ পৰিকল্পনা কৰা হৈছে৷ কিন্তু বিগত দুবছৰধৰি AGCLত সৃষ্টি হোৱা বিশৃংখল প্ৰণালীয়ে কোম্পানীটো ব্যক্তিগতকৰণৰ পথ প্ৰশস্ত কৰিছে৷
শদিয়াৰ বিধায়ক বলীন চেতিয়া অধ্যক্ষ হৈ থকা অসম গেছ কোম্পানী লিমিটেড হৈছে সকলো নিগমৰ ভিতৰতে লাভজনক প্ৰতিষ্ঠান৷ AGCLৰ বাদে অসম চৰকাৰৰ আন কোনো প্ৰতিষ্ঠানে লাভৰ মুখ দেখিবলৈ সক্ষম হোৱা নাই৷
তাৰ পিছতো তলে তলে আৰম্ভ হৈছে AGCLৰ ব্যক্তিগতকৰণৰ প্ৰস্তুতি৷ এইবছৰ নহ’লেও নিৰ্বাচনৰ পিছত AGCL প্ৰাইভেট কোম্পানীক গতাই দিয়াটো অনিবাৰ্য হৈ পৰিছে৷

Please follow and like us:

0