যি হয় হৈ থাকক
মথাউৰি নাসাজে ঠিকাদাৰে
২০২৩-২৪ বৰ্ষতে বানে ছিঙা মথাউৰি নিৰ্মাণ কৰি এই পৰ্যন্ত ধন লাভ কৰা নাই ঠিকাদাৰে৷ আনটো বাদেই, ৱৰ্ক অৰ্ডাৰো লাভ কৰিবলৈ সক্ষম নহ’ল জলসম্পদ বিভাগৰ বহু ঠিকাদাৰ৷
যাৰ বাবে এতিয়া একাংশ ঠিকাদাৰে এইবাৰ বাৰিষাত মথাউৰি নিৰ্মাণ, বানত ক্ষতিগ্ৰস্ত অংশ মেৰামতি নকৰাৰ হুংকাৰ দিছে৷
এছ ডি আৰ এফ আঁচনিৰ ছেকশ্যন ৫০১ৰ অধীনত কাম কৰা বহুসংখ্যক ঠিকাদাৰে এতিয়াও চৰকাৰৰ পৰা কোটি কোটি টকা পাবলৈ বাকী আছে৷
ৰাজহ বিভাগৰ প্ৰশাসনিক অনুমোদন নোহোৱাৰ বাবেই এইসকল ঠিকাদাৰ দীৰ্ঘদিন ধৰি প্ৰাপ্যৰ পৰা বঞ্চিত হৈছে৷
লখিমপুৰৰ শিঙৰা, সোৱণশিৰি, গাভৰু, শিঙিয়া, ডিক্ৰং আদি নদীয়ে দুবছৰ পূৰ্বেই ছিঙি নিয়া মথাউৰি পৰৱৰ্তী সময়ত জিলা দুৰ্যোগ প্ৰশমন বিভাগৰ নিৰ্দেশত মেৰামতি কৰা হৈচিল৷ কিন্তু ঠিকাদাৰে আজিও উক্ত ধন লাভ নকৰিলে৷
সেই সময়ত ছিগা অংশ নিৰ্মাণ কৰা, খঙি যোৱা মথাউৰি মেৰামতিৰ পিছত জিলা আয়ুক্তই চৰজমিন পৰিদৰ্শন কৰি কাম সম্পূৰ্ণ হোৱাৰ প্ৰমাণ-পত্ৰ ঠিকাদাৰক দিছিল৷
তথাপি বহু ঠিকাদাৰে ধন নাপালে৷ তেওঁলোকে এই পৰ্যন্ত জলসম্পদ বিভাগৰ পৰা ৱৰ্ক অৰ্ডাৰো লাভ কৰা নাই৷
কিয়নো ৰাজহ বিভাগে এই কামসমূহৰ সন্দৰ্ভত প্ৰশাসনিক অনুমোদন নোহোৱাৰ বাবে জলসম্পদ বিভাগে ঠিকাদাৰক ৱৰ্ক অৰ্ডাৰ দিব পৰা নাই৷ গতিকে মথাউৰিৰ কামত হাত নিদিয়াৰ সিদ্ধান্ত লৈছে ঠিকাদাৰে৷
0
