বৰ্তমানৰ উপাচাৰ্যই ছাত্ৰ-ছাত্ৰীক ফেপেৰি পাতি ধৰে
কয়
মোক মাৰা তোমালোকে
ডিচিছন এটা ল’বলৈয়ো ধৈৰ্য ধৰিব নোৱাৰা
কিন্তু পূৰ্বে পৰিৱেশ তেনে নাছিল
বিশ্ববিদ্যালয়ৰ প্ৰথম উপাচাৰ্য কৃষ্ণকান্ত সন্দিকৈয়ে দায়িত্ব গ্ৰহণ কৰাৰ পিছত অসমৰ প্ৰধানমন্ত্ৰী তথা শিক্ষামন্ত্ৰী গোপীনাথ বৰদলৈয়ে কাম কেনে চলিছে সেই বিষয়ে আলোচনা কৰিবলৈ গৈছিল৷
তেওঁ মাতি পঠিয়ালে বিশ্ববিদ্যালয়ৰ পঞ্জীয়ক ফণীধৰ দত্তক৷ দত্তই সন্দিকৈলৈ খবৰ পঠিয়ালে। কিন্তু কৃষ্ণকান্ত সন্দিকৈয়ে ক’লে
মই বৰদলৈক লগ ধৰিব নোৱাৰোঁ
বিশ্ববিদ্যালয়ৰ ভিতৰত ৰাজনৈতিক নেতাৰ প্ৰৱেশ নিষেধ
স্বাভাৱিকতে বৰদলৈ হতভম্ব হ’ল। তেওঁ উভতি গ’ল।
গোপীনাথ বৰদলৈয়ে তাৰ পিছতো পণ্ডিত কৃষ্ণকান্ত সন্দিকৈক লগ ধৰিবলৈ চেষ্টা কৰিছিল৷ আনকি বৰদলৈৰ অনুৰোধতে ৰাজ্যপালেও সন্দিকৈক গুৱাহাটীৰ ছাৰ্কিট হাউচলৈ মাতি পঠিয়াইছিল৷ কিন্তু সন্দিকৈ নাচোৰবান্দা৷
তেতিয়া প্ৰধানমন্ত্ৰী বৰদলৈ হতাশ হ’ল৷ এদিন হতাশা পঞ্জীয়ক ফণীধৰ দত্তৰ আগতে প্ৰকাশ কৰিলে৷
সেয়ে দত্তই এদিন সন্দিকৈক কাণ চোৱালে
গোপীনাথ বৰদলৈৰ সৈতে এদিন কথা পতাটো ভাল হ’ব!
কিন্তু সন্দিকৈ আকৌ গৰজিহে উঠিল৷ তেওঁ ক’লে
আগতেই কৈ থৈছোঁ-বিশ্ববিদ্যালয়লৈ বিধানসভাৰ সদস্য আহিব নোৱাৰিব
চৰকাৰে আমাৰ কামত মাত মাতিব নোৱাৰিব
সেই কথাটোৱেই বহুদিন ভাবি চিন্তি পঞ্জীয়ক দত্তই গোপীনাথ বৰদলৈক কৈছিল৷ তেতিয়াহে সম্বিত ফিৰাই পালে গোপীনাথ বৰদলৈয়ে৷ হাঁহি হাঁহিয়েই উপাচাৰ্যক লগ পোৱাৰ আশা পৰিত্যাগ কৰিলে লোকপ্ৰিয় বৰদলৈয়ে৷
সেইখন বিশ্ববিদ্যালয়তে বৰ্তমান উপাচাৰ্যই ছাত্ৰ-ছাত্ৰীক ফেপেৰি পাতি ধৰিছে৷ কৃষ্ণকান্তৰ পৰা ননীগোপাল মহন্তলৈ পাৰ হৈ গৈছে দীঘলীয়া অধ্যায়৷
0
