বিজেপিয়ে গোটে গোটে গিলিবলৈ ধৰিছে AIADMKক
তামিলনাডুৰ জাতীয়তাবাদী দলটোক অজগৰৰ দৰে মেৰিয়াই ধৰিছে বিজেপিয়ে
অসমৰ অগপৰ দৰে AIADMKক গিলিবলৈ ওলাইছে বিজেপি
অটল বিহাৰী বাজপেয়াৰ দিনতে বিচ্ছেদ ঘটিছিল বিজেপি আৰু AIADMKৰ৷ কিন্তু আকৌ মিলনেৰে দুয়োটা দল মধুচন্দ্ৰিকাৰ বাবে সাজু হৈছে৷
প্ৰয়াত জয়াললিতাৰ দলৰ সৈতে মিত্ৰতা স্থাপনৰ ইচ্ছা কৰিছে নৰেন্দ্ৰ মোদীয়ে৷ যেনেদৰে অগপৰ সৈতে সন্ধি কৰিয়েই অসমত বিজেপি বৰ্তমানৰ স্থিতিত উপনীত হৈছে, সেইদৰে তামিলনাডুত AIADMKক ব্যৱহাৰ কৰিবলৈ মোদীয়ে পৰিকল্পনা কৰিছে৷
প্ৰধানমন্ত্ৰীয়ে বিষয়টোত আলোচনাৰ দায়িত্ব দিছে বিশ্বস্ত সতীৰ্থ অমিত শ্বাহক৷ গতিকে তামিল কিংবদন্তী এম জি ৰামচন্দ্ৰনে প্ৰতিষ্ঠা কৰা দলটোৰে বিজেপিৰ জোঁটবন্ধনৰ আলোচনা বহুদূৰ আগুৱাইছে৷
ৰামচন্দ্ৰনৰ পিছত আমৃত্যু জয়াললিতাই পৰিচালনা কৰা AIADMKৰ বৰ্তমানৰ মুৰব্বী এড্ডাপাড়ি পালনিস্বামীৰ সৈতে ইতিমধ্যে আলোচনাত বহিছে অমিত শ্বাহ৷ সমৰ্থিত সূত্ৰই প্ৰকাশ কৰা অনুসৰি দুয়োৰে বৈঠকত প্ৰায় চূড়ান্ত হৈছে মিত্ৰতা৷ বিজেপি নেতৃত্বৰ ছলাহী কথাত ভোল গৈছে AIADMK৷
সেয়েহে অসমৰ লগতে ২০২৬ৰ মে’ত অনুষ্ঠিতব্য ৰাজ্যখনৰ নিৰ্বাচনৰ বাবে দুয়োটা দলে একত্ৰিতভাৱে প্ৰস্তুতি চলোৱাৰ সিদ্ধান্ত লৈছে৷ অৱশ্যে মিত্ৰতাৰ বাবে বিজেপিক কেবাটাও চৰ্ত আৰোপ কৰিছে পালনিস্বামীয়ে৷
তদানুসৰি অহাবছৰৰ নিৰ্বাচনৰ বাবে মুখ্যমন্ত্ৰীৰ প্ৰাৰ্থী হ’ব লাগিব AIADMKৰ৷ দ্বিতীয়তে AIADMKই এৰি দিয়া আসনতহে বিজেপিয়ে প্ৰাৰ্থী প্ৰক্ষেপ কৰিব পাৰিব৷
আঞ্চলিক দলটোৰ অভ্যন্তৰীণ কাম-কাজতো বিজেপি সোমাব নোৱাৰিব৷ পালনিস্বামীৰ ৰাজনৈতিক শত্ৰু হিচাপে পৰিচিত দলটোৰ বহিষ্কৃত নেতা টিটিভি দিনকৰণ আৰু অ’ পন্নিৰছেলভামকো অমিত শ্বাহে আসৈ দিব নোৱাৰিব বুলি চৰ্ত আৰোপ কৰা হৈছে৷ সকলো চৰ্ত মানিও লৈছে অমিত শ্বাহে৷
অসমত যিদৰে অগপৰ সকলো চৰ্ত বিজেপিয়ে পূৰ্বে মানি লৈছিল, সেই ফৰ্মুলাই তামিলনাডুতো অৱলম্বন কৰিছে৷ গতিকে আকৌ দুয়োটা দলৰ মাজত নিশ্চিত হৈছে মিত্ৰতা৷
0
