গাড়ী চুৰিৰ নতুন জাল তৰিছে চোৰে লীজত লোৱাৰ বুদ্ধিৰে গাড়ীবোৰ চুৰি কৰিছে এদল চোৰে৷ মালিকক মাহিলী ২৫ হাজাৰ টকা দি থকাৰ লোভ দেখুৱাই লৈ গৈছে গাড়ী৷ লাখটকীয়া বাহন অৰুণাচল অথবা নাগালেণ্ডত চোৰে বিক্ৰী কৰিছে৷ মালিকে চুক্তি কৰি লোৱাৰ পিছতো গাড়ী উদ্ধাৰ কৰিব পৰা নাই৷ বৰ্তমান কেবাখনো জিলাত ব্যৱসায় কৰাৰ ইচ্ছাৰে গাড়ী কিনি লীজত দিছে থলুৱা যুৱকে৷ বেংকৰ লোনৰ কিস্তি মাৰিবলৈ তেওঁলোকে অচিনাকি মানুহক চুক্তি পত্ৰ কৰি বাহন চমজাই দিছে৷ অৱশ্যে প্ৰায়বোৰ গাড়ীতে লগাই দিছে GPS৷ সেই চুক্তি অনুসৰি গাড়ী নিয়াৰ পিছত দুমাহমানলৈ পইচা পাইছেও মালিকে৷ কিন্তু তাৰ পিছতহে আৰম্ভ হৈছে আচল নাটকখন৷ GPS খুলি লীজত নিয়া পাৰ্টীয়ে নাগালেণ্ডতে বিক্ৰী কৰিছে গাড়ী৷ এইধৰণৰ ঘটনাৰ বাবে ৩০ খনৰো অধিক গাড়ীৰ মালিক সৰ্বস্বান্ত হৈছে৷ পাহাৰীয়া ৰাজ্যত চুক্তি পত্ৰ থকাৰ পিছতো গাড়ীৰ উৱাদিহ পোৱা নাই মালিকে৷ লীজত নিয়া পাৰ্টীৰো নাই খবৰ৷ অচিনাকি মানুহে ব্যৱসায় কৰাৰ চৰ্তৰে নি গাড়ী পাহাৰত বিক্ৰী কৰি দিছেগৈ৷ ফলত গাড়ী লীজত দিয়াৰ বেপাৰেই হৈ পৰিছে বিপজ্জনক৷ বেংকৰ লোন লৈ গাড়ী কিনা অসমীয়াই মূলধনো হেৰুৱাইছে৷
0
