এইটো সত্য কথা কৈছে মুখ্যমন্ত্ৰীয়ে
অসমত ডিজিটেল মিডিয়াত কৰ্মৰত সংবাদকৰ্মীৰ সৈতে বাতৰি কাকত নাইবা চেনেলৰ কৰ্মীৰ মতৰ বিভাজন আছে৷
প’ৰ্টেলৰ সাংবাদিকক নিমন্ত্ৰণ জনোৱা সংবাদমেলত ডিব্ৰুগড়ৰ পেপাৰ অথবা চেনেলৰ সাংবাদিকে অংশগ্ৰহণ নকৰে৷ তেওঁলোকে সংবাদমেললৈ নিমন্ত্ৰণ কৰিবলৈ যোৱা সময়তে আয়োজকক জনাই দিয়ে কথাটো৷
মুখ্যমন্ত্ৰীয়ে নিউজ-9 নামৰ সংবাদগোষ্ঠীৰে সাক্ষাৎকাৰত প্ৰকাশ কৰা মতে মূলসুতিৰ সাংবাদিক বিৰোধিতাৰ বাবে প’ৰ্টেলৰ সংবাদসেৱীক চৰকাৰে সাংবাদিক হিচাপে স্বীকৃতি দিব পৰা নাই৷ অৰ্থাৎ সাংবাদিকৰ মাজত শ্ৰেণীবিভাজনৰ বাবে চৰকাৰ দায়ী নহয়৷ দায়ী হৈছে পেপাৰ আৰু নিউজ চেনেলৰ সাংবাদিকসকলহে৷
এই কথাটো কিন্তু সত্য৷ দিলোৱাৰ হুছেইন মজুমদাৰৰ হৈ সংখ্যাগৰিষ্ঠ সাংবাদিকে প্ৰতিবাদ কৰিলে৷ কিন্তু অসমৰ কোনো এটা প্ৰেছ ক্লাবতে প’ৰ্টেলৰ সংবাদসেৱীক আনুষ্ঠানিক সদস্যপদ দিয়া নহয়৷
নগাঁও প্ৰেছ ক্লাবতে RNI পঞ্জীয়নভুক্ত কাকত আৰু স্বীকৃত নিউজ চেনেলৰ প্ৰতিনিধিকহে প্ৰকৃত সদস্যৰ মৰ্যাদা দিয়া হয়৷ ডিব্ৰুগড়ত প’ৰ্টেলৰ সংবাদসেৱী উপস্থিত থকা সংবাদমেল মূলসুতিৰ সাংবাদিকে বৰ্জন কৰে৷
যোৰহাটতো পৰিস্থিতি অনুৰূপ৷ প’ৰ্টেলৰ সাংবাদিক প্ৰেছ ক্লাবলৈ যায়৷ কিন্তু বিপদে-আপদে তেওঁলোকে প্ৰেছ ক্লাবৰ সহায় নাপায়৷
মুক্ত সংবাদ মাধ্যমক বিশ্বই স্বীকৃতি দিছে৷ তথাপি অসমত চলি আছে সাংবাদিকৰ শ্ৰেণী বিভাজনৰ খোৱা কামোৰা৷
প্ৰতিখন জিলাৰে প্ৰেছ ক্লাবৰ অৱলোকন কৰি আমি কৈছোঁ- মুখ্যমন্ত্ৰীয়ে সঁচা কথা কৈছে৷
0
