ভগৱানক পিছত পূজা কৰিম
আগতে নাচিটো লওঁ
কেমেৰা উলিওৱা, ৰীলছ বনোৱা
ঈশ্বৰ ভক্তি পিছৰ কথা৷ মন্দিৰলৈ যোৱাৰ প্ৰথমটো উদ্দেশ্য ৰীলছ বনোৱা৷ চাদৰ-মেখেলা পিন্ধি হাতত চাকি-ধূপৰ সম্ভাৰ লৈ ৰীলছত নাচিবলৈহে মন্দিৰলৈ যায় হিন্দু যুৱতী৷
তেওঁলোকৰ বাবে ধৰ্মীয় অনুষ্ঠানৰ মৰ্যাদাই নোহোৱা হৈছে৷ মন্দিৰৰ চৌহদত সোমোৱাৰে পৰা সেৱা কৰালৈ ভিডিঅ’ কৰি থকাটোৱেই হৈছে তেওঁলোকৰ মন্দিৰ দৰ্শনৰ উদ্দেশ্য৷
আমি দেখুওৱা এই দৃশ্যটো লখিমপুৰৰ শ্ৰীশ্ৰী পদুমনি আই থানৰ৷ উত্তৰ অসমৰ ভক্তই এই জাগ্ৰত দেৱালয়ত সদায়ে উপাসনা কৰে৷ দূৰ-দূৰণিৰ ভক্তয়ো মনোবাঞ্জা সিদ্ধিৰ বাবে পদুমনি আই থানত শৰাই দিয়ে৷
কিন্তু সেইখন প্ৰাচীন দেৱালয়ৰ সন্মুখতো ৰীলছ বনাই থাকে দৰ্শনাৰ্থী যুৱতীয়ে৷ ছ’চিয়েল মিডিয়াৰ ভূত মূৰত লম্ভিছে যে ধৰ্মীয় অনুষ্ঠানৰ মৰ্যাদাও তেওঁলোকৰ বাবে শূন্য হৈ পৰিছে৷ ফে’চবুকত ৰীলছ আপলোড কৰি ভিউজ পোৱাৰ আশাত মন্দিৰৰ প্ৰৱেশদ্বাৰতে নাচিবলৈ লৈছে নৰ্তকীয়ে৷
কিন্তু মছজিদ অথবা গিৰ্জা ক’তো এনে কাম কৰিবলৈ অনুমতি দিয়া নহয়৷ প্ৰতিটো ধৰ্মৰে ধৰ্মীয় স্থানত প্ৰৱেশৰ সময়ত শালীনতা ৰক্ষা কৰাটো বাধ্যতামূলক৷ কিন্তু হিন্দুধৰ্মীয় দেৱালয়ৰ গে’টতো যৌনগন্ধী নৃত্য কৰাত বাধা নাই৷
ৰীলছ বনোৱা যুৱতীয়ে অসমৰ প্ৰতিটো মন্দিৰতে আহুকাল কৰিছে৷ ভিউজৰ খঁকত ডিজিটেল ক্ৰিয়েটৰে মন্দিৰৰ পৰিৱেশ প্ৰদূষিত কৰিছে৷ তেওঁলোকে মন্দিৰ দৰ্শন কৰিবলৈ যোৱাটো যেন হৈ পৰিছে গৌণ৷ মন্দিৰৰ ধুনীয়া পৰিৱেশত ৰীলছ বনোৱাটোহে মুখ্য হৈ পৰিছে৷
ডিজিটেল ক্ৰিয়েটৰ, ভ্লগাৰ আদিবোৰে সাধাৰণ ভক্তকো অতিষ্ঠ কৰিছে৷ কাৰোবাৰ কেমেৰাত মুখ ওলাই যায় বুলি লুকাই থাকিবলগীয়া হৈছে ভক্ত৷
0
