ছাৰা আলি খানৰ দৰ্শন পোৱাৰ বাবে জিকিল, কিন্তু অধিনায়ক হিচাপে সফল হ’বলৈ ৰিয়ান হ’ব লাগিব নম্ৰ৷ আক্ৰমণাত্মক মনোভাব ফিল্ডৰ বাহিৰত পৰিহাৰ কৰিব লাগিব৷ কথাষাৰ আমি কোৱা নাই, কৈছে কেবাগৰাকী ক্ৰিকেট পণ্ডিতে৷
কেপ্টেইন হিচাপে ৰিয়ানে প্ৰথমখন মেচ জিকাইছে ৰাজস্থান ৰয়েলছক৷ তথাপি যেন ৰিয়ানৰ ষ্টাইলত ভুল ৰৈ গৈছে৷
বিশেষকৈ খেলৰ শেষত এদল ডেকাৰ সৈতে ছেলফি উঠাৰ পিছত ৰিয়ানে যি কৰিলে, সেয়া মানি ল’ব পৰা বিধৰ নহয়৷ ষ্টেডিয়াম কৰ্মচাৰীসকলে মেচৰ শেষত ৰিয়ানক ছেলফিৰ বাবে অনুৰোধ কৰিছিল৷ তেওঁলোকৰ সৈতে ৰিয়ানে ছেলফিও ক্লিক কৰিলে৷ পিছে হাতত দিয়াৰ সলনি ৰিয়ানে দলি মাৰিহে অনুৰাগী যুৱকক দিলে ফোনটো৷
কিন্তু তাৰকা কোনো খেলুৱৈয়ে এনে আচৰণ কৰাৰ আগে-পিছে উদাহৰণ নাই৷ সঞ্জু ছেমছনেও অনুৰাগীৰ অনুৰোধ ৰক্ষা কৰি ছেলফি উঠিছে৷ ভাগৰুৱা অৱস্থাতো দিছে অটোগ্ৰাফ৷ ৰিয়ানৰ দৰে তেওঁলোকে ফোনটো দলিয়াই দিয়া নাই৷
ক্লাব ক্ৰিকেটকলৈয়ো অসমত জাতীয়তাবাদৰ ঢল উঠাৰ সময়ত ৰিয়ানৰ আচৰণে বিতৰ্কৰ সূত্ৰপাত কৰিছে৷ তেওঁক নম্ৰ হ’বলৈ উপদেশ দিছে অগ্ৰজ ক্ৰিকেটাৰে৷
আনহাতে ৰাজস্থান ৰয়েলছৰ কেৰিবিয়ান ক্ৰিকেটাৰ ছিমৰন হেটমায়াৰকো আগতীয়াকৈ বিহু খাবলৈ অসমলৈ নিমন্ত্ৰণ কৰিছে অনুৰাগীয়ে৷ সিদিনা বৰ্ষাপাৰা বাউণ্ডেৰীত ফিল্ডিং কৰি থকাৰ সময়ত ছিমি বুলি সম্বোধন কৰি হেটমায়াৰক বিহুৰ বাবে জনাইছে নিমন্ত্ৰণ৷
অৱশ্যে হাঁহি মাৰিলেও হেটমায়াৰে বুজি নাপালে অসমীয়া ডেকাৰ নিমন্ত্ৰণ৷ তথাপি ভিডিঅ’টোৱে দৰ্শকক দিছে আমোদ৷
0
