গ্ৰামাঞ্চলত বিজেপি পালিনেতাই বিতৰণ কৰিছে অৰুণোদয়ৰ নকল প্ৰ-পত্ৰ৷ মহিলাসকলক প্ৰলোভিত কৰিবলৈ মধ্য আৰু উজনি অসমত জাল আবেদন-পত্ৰ বিলাই ফুৰিছে পালিনেতাই৷ যিসকলক মহিলাক ধন দিবলৈ মন নাই, তেওঁলোকক দিছে নকল প্ৰ-পত্ৰ৷
প্ৰথমে অমিয় ভূঞাৰ বিহপুৰীয়া সমষ্টিত বিজেপিৰ পালিনেতাই গুৰুতৰ অনিয়ম কৰাৰ অভিযোগ উত্থাপন হৈছিল৷
সমষ্টিটোৰ ভোলাবৰী পঞ্চায়তৰ একাংশ মহিলাৰ অভিযোগ অনুসৰি তেওঁলোকে লাভ কৰা প্ৰ-পত্ৰৰ সৈতে প্ৰকৃত ফৰ্মখনৰ মিল নাই৷ অসম চৰকাৰে অৰুণোদয়ৰ বাবে দিয়া ফৰ্মত নীলা চিঞাহীৰ ক্ৰমিক নম্বৰ আছে৷ কিন্তু একাংশ মহিলাই লাভ কৰা প্ৰ-পত্ৰত ক’লা চিঞাহীৰেহে ক্ৰমিক নম্বৰ লিখা আছে৷
প্ৰকৃত আবেদন-পত্ৰখনৰ সৈতে চিঞাহীৰ পাৰ্থক্যও স্পষ্ট হৈ আছে৷ গতিকে সেইখন ডুপ্লিকেট আবেদন-পত্ৰ বুলি মহিলাসকলৰ সন্দেহ হৈছে৷ এই সন্দৰ্ভত তেওঁলোকে বিধায়ক অমিয় কুমাৰ ভূঞাৰ কাষ চাপিছিল৷ কিন্তু বিধায়কে সদুত্তৰ নিদিলে৷
সমষ্টিটোৰ প্ৰান্তে প্ৰান্তে পূৰ্বে অৰুণোদয় আঁচনিত অন্তৰ্ভুক্ত বহু হিতাধিকাৰীৰো নাম কাটি দিয়া হৈছে৷ অমিয় ভূঞাৰ আশিসপুষ্ট বিজেপি পালিনেতাই দালালৰ দৰে বাছনি কৰিছে অৰুণোদয় হিতাধিকাৰীক৷
মুখ্যমন্ত্ৰীয়ে সকলো যোগ্য মহিলাই ধন লাভ কৰিব বুলি ঘোষণা কৰিছে৷ একেসময়তে ৰাজ্যৰ কেবাঠাইতো বিজেপি পালিনেতাই বিলাই ফুৰিছে ঘৰতে জেৰক্স কৰা ফৰ্ম৷
পঞ্চায়ত নিৰ্বাচনৰ পূৰ্বে মহিলাসকলক আকৰ্ষণৰ উদ্দেশ্যে এইসকল পালিনেতাই ভয়ংকৰ অপকৰ্ম কৰিছে৷ তেওঁলোকে মুখ্যমন্ত্ৰীৰ নিৰ্দেশো অৱমাননা কৰিছে৷
এই কাণ্ডটো কিন্তু হৈ পৰিছে ভয়ংকৰ৷ অৰুণোদয়ৰ ডুপ্লিকেট ফৰ্ম বিলোৱা পালিনেতাৰ বাবে গ্ৰামাঞ্চলত খহিছে বিজেপিৰ ভেটি৷
0
