ৰাইজ, উমৰাংচ’ৰ কথা মনত আছেনে! কয়লাখনিত পানী সোমাই ১৯ জন শ্ৰমিকে যে কুকুৰ-মেকুৰীৰ দৰে প্ৰাণ হেৰুৱাইছিল, সেইটো ঘটনাৰ কথা কৈছোঁ৷
সেই ৰেট হোল কয়লাখনিতে শ্ৰমিকৰ মৃতদেহ গেলি-পচি মাটিৰ লগত মিলি গ’ল৷ তথাপি বন্ধ নহ’ল অবৈধ কয়লা খনন৷ এন্দুৰৰ গাঁতৰ দৰে কয়লাখনিৰ ভিতৰত সোমাই অদ্যাপি শ্ৰমিকে খান্দি আছে কয়লা৷
লিডু পাহাৰত সদায় নিশা চলিছে কয়লা খনন৷ উমৰাংচ’ৰ ঘটনাৰ প্ৰভাৱ লিডু পাহাৰত নাই পৰা৷ পাহাৰত এদিনো ক্ষতি নোহোৱাকৈ চলি আছে কয়লা খনন৷ সেয়ে সদায় নিশা পাহাৰত জুই জ্বলিছে৷ লিডু পাহাৰত দাওদাওকৈ জ্বলি থকা জুইকুৰা ৫ কিলোমিটাৰ দূৰৰ পৰাই দৃষ্টিগোচৰ হৈছে৷
উমৰাংচ’ৰ সেই অঘটনৰ পিছতো লিডু পাহাৰত কমা নাই ৰেট হোল কয়লা খনন৷ সদায়েই পাহাৰৰ বুকু কয়লা বিচাৰি মাফিয়াই খন্দাই আছে৷ তেওঁলোকৰ কথামতেই হাতৰ মুঠিত জীউ লৈ ৰেট হোলত সোমাইছে শ্ৰমিক৷
সদায় পাহাৰৰ পৰা তললৈ নমোৱা হৈছে কয়লা৷ এই কয়লাখনিত খননৰ বাবে নাই বিভাগীয় অনুমতি কোনোপধ্যে নাই৷
আগতে লিডু পাহাৰ নানাধৰণৰ বন্যহস্তীৰে ভৰি আছিল৷ হাতী আৰু ভালুকৰো বাসস্থান আছিল লিডু পাহাৰ৷ কিন্তু কয়লা মাফিয়াই পাহাৰটো খান্দি পেলালে৷
সেয়ে বৰ্তমান ধনগুলৈৰ দৰে নিশা লিডু পাহাৰত জ্বলি থাকে জুই৷ সেই জুইকুৰা কিন্তু ধনগুলৈ নহয়, কয়লা মাফিয়াই জ্বলোৱা জুইহে৷
0
