মুখ্যমন্ত্ৰীকো শাস্তি দিব নেকি শ্ৰীমন্ত শংকৰদেৱ সংঘই?

অপমানিত হ’ল শ্ৰীমন্ত শংকৰদেৱ সংঘ!
সংঘৰ ভকতেও পুহিবই লাগিব গাহৰি
মুখ্যমন্ত্ৰীয়ে কাৰোৰে নাম নক’লে, কিন্তু কাক ক’লে বুজোতাই বুজিলে৷
পিছে কথাটো জানোঁ ইমান সহজ!
গাহৰি নালাগে, ব্ৰইলাৰ কুকুৰা পুহিলেই শংকৰ সংঘই বহিষ্কাৰ কৰে৷ ঘৰত ব্ৰইলাৰ ফাৰ্মো খুলিবলৈ নিদিয়ে৷ লোকেল কুকুৰা পোহাৰ দোষতে এঘৰীয়া কৰি থয় গাঁৱৰ বাপক৷
গতিকে মুখ্যমন্ত্ৰীয়ে ক’লে বুলিয়েই গাঁৱৰ মানুহে কেনেকৈ পুহিব গাহৰি?
অসমৰ মুখ্যমন্ত্ৰীৰ কথাবোৰ ৰাইজে আদেশ হিচাপেই গণ্য কৰে৷ গতিকে মিঞাক বাধা দিবলৈ যদি তেওঁলোকে গাহৰি পালন কৰে তেন্তে শংকৰ সংঘত মানুহেই নোহোৱা হ’ব৷
বেছি দিনৰ কথা নকওঁৱেই, যোৱা এবছৰৰ ভিতৰতে সংবিধান উলংঘা কৰি ব্ৰইলাৰৰ ব্যৱসায় কৰাৰ জগৰত সংঘই কমেও ৭৭টা সংগী পৰিয়ালক বহিষ্কাৰ কৰিছে৷ গাহৰি পোহাৰ দোষতো গাঁৱত এঘৰীয়া হৈছে গোটাচেৰেক পৰিয়াল৷
তেনেস্থলত মুখ্যমন্ত্ৰীৰ ভাষাত বাহিৰা মানুহক বাধা দিবলৈ গাঁৱে গাঁৱে গাহৰি পালন কৰিলে সংঘই সদায় বহিষ্কাৰৰ ন’টিচ ছপাই থাকিব লাগিব৷ কুকুৰা পোহাৰ বাবেই সংগীক বহিষ্কাৰ কৰা সংঘই গাহৰি পোহা ভকতৰ বিৰুদ্ধে সম্ভৱতঃ কে’ছেই ৰুজু কৰিব৷
কাৰণ শ্ৰীমন্ত শংকৰদেৱ সংঘৰ অভিধান অনুসৰি গাহৰি পালন হৈছে বৈষ্ণৱ ধৰ্মৰ নীতিবিৰুদ্ধ৷ সেয়ে শেহতীয়াকৈ শিৱসাগৰ আৰু ডিব্ৰুগড়ৰ শতাধিক আহোম পৰিয়ালে শংকৰ সংঘ ত্যাগ কৰিছে৷ সংঘৰ পৰা জনজাতীয় ভকতৰ প্ৰস্থানৰ কাৰণেই হৈছে গাহৰি আৰু কুকুৰা পালনত থকা বাধা৷
অৱশ্যে ব্ৰাহ্মণ পৰিয়ালেও ঘৰত গাহৰি পালনক মহাপাপ বুলিয়েই গণ্য কৰে৷ অসমৰ অধিকাংশ স্থানতে গাহৰি মাংসৰ প্ৰচলন আছে৷ কিন্তু গাহৰি নোপোহে বেছিভাগ লোকে৷ তেওঁলোকে কিনিহে খায়৷
বহুতো এলেকাতে আকৌ বাহিৰৰ চৌকাতে গাহৰি মাংস ৰান্ধি খোৱাটেই অলিখিত নিয়ম৷ তেনেস্থলত মুখ্যমন্ত্ৰীৰ কথামতে প্ৰতিখন গাঁৱতে গাহৰি পুহিবলৈ ল’লে সৰ্বনাশ হ’ব৷ শংকৰ সংঘৰ পদাধিকাৰে বহিষ্কাৰ কৰিব লাগিব ৮০ শতাংশ বাপ-বৈষ্ণৱক৷

Please follow and like us:

0