অসমীয়া কোন! অসমীয়াৰ সংজ্ঞাকলৈয়ো অসমত মাজতে বিতৰ্ক হৈছিল৷ এইবাৰ বিতৰ্ক হৈছে সাংবাদিক সংজ্ঞাক লৈ৷
কিন্তু অসমত দিলোৱাৰ হুছেইন মজুমদাৰ সাংবাদিক নহ’ব পাৰে, কিন্তু কেন্দ্ৰীয় চৰকাৰৰ মতে তেওঁ সাংবাদিক৷ কাৰণ তথ্য-প্ৰযুক্তি বিধি ২০২১ৰ মধ্যৱৰ্তী নিৰ্দেশনা আৰু ডিজিটেল মিডিয়া নিয়মাৱলী অনুসৰি ইণ্টাৰনেটৰ জৰিয়তে বাতৰি সম্প্ৰচাৰ কৰাসকলো সাংবাদিক৷ এইসকলক বিকল্প মাধ্যমৰ সাংবাদিক বুলি ইতিমধ্যে স্বীকৃতি দিয়া হৈছে৷
দ্বিতীয়বাৰলৈ গ্ৰেপ্তাৰ হোৱা দিলোৱাৰ হুছেইন মজুমদাৰক ডাম্পাৰ ক্ৰয়ৰ দৰে কথাৰে দুৰ্নীতিগ্ৰস্ত সজাবলৈ বিচৰা হৈছে৷ কিন্তু যদি তেওঁ দুৰ্নীতিত লিপ্ত হৈছে তেন্তে সেয়াও হ’ব চৰকাৰৰ ব্যৰ্থতা৷ কাৰণ ইতিমধ্যে চৰকাৰী এজেন্সীয়ে দিলোৱাৰৰ দুৰ্নীতি উদঘাটন কৰাটো দায়িত্ব আছিল৷
মুখ্যমন্ত্ৰীৰ মতে চৰকাৰে কোনো সাংবাদিকক গ্ৰেপ্তাৰ কৰা নাই৷ যদি সেইটোৱেই হয় তেন্তে ৰৱিশ কুমাৰো সাংবাদিক নহয়৷ কাৰণ NDTVৰ পৰা প্ৰস্থানৰ পিছত তেওঁ ইউটিউবত নিজা চেনেলত বাতৰি প্ৰচাৰ কৰি আছে৷
কিন্তু ইমানখিনি আলোচনা হোৱাৰ পিছতো দিলোৱাৰ হুছেইন মজুমদাৰৰ অপৰাধৰ প্ৰমাণ ওলোৱা নাই৷ সংবাদ মাধ্যমৰ পৰা আঁতৰাই ৰখা হৈছে এপেক্স বেংকৰ নিৰাপত্তাকৰ্মী শিশুৰাম বড়োক৷ CCTV ফুটেজো এইপৰ্যন্ত ওলোৱা নাই৷
সাংবাদিক নহয় বুলি চৰকাৰে ঘোষণা কৰা দিলোৱাৰ কিন্তু গুৱাহাটী প্ৰেছ ক্লাবৰো সহকাৰী সাধাৰণ সম্পাদক পদত অধিষ্ঠিত হৈ আছে৷ সেই প্ৰেছ ক্লাবৰ বেছিভাগ সদস্যই চৰকাৰস্বীকৃতি ছপা আৰু বৈদ্যুতিন মাধ্যমৰ প্ৰতিনিধি৷ লগতে প্ৰেছ ক্লাবো চৰকাৰীভাৱে পঞ্জীয়নভুক্ত৷ কটন কলেজৰ একালৰ ছাত্ৰ দিলোৱাৰ সাংবাদিকৰ ডিগ্ৰীধাৰীও৷
বৰ্তমান বিভিন্ন সংবাদ প্ৰতিষ্ঠানত কৰ্মৰত সাংবাদিকৰ ভিতৰত মাত্ৰ ১০ শতাংশৰহে আছে DIPRৰ পৰিচয় পত্ৰ৷ গতিকে নতুন নীতি অনুসৰি সেইসকলহে সাংবাদিক হ’ব পাৰিব৷
মুঠতে কথাবোৰ মিলা নাই৷ অমিল হৈ আছে অংক৷ সাংবাদিকৰ সংজ্ঞাও অসমীয়াৰ সংজ্ঞাৰ দৰে অমীমাংসিত হৈ আছে৷
0
