খোজ কাঢ়িবই নোৱাৰে, কিন্তু চুঁচৰি-বাগৰি ঘৰৰ পৰা ওলাই গৈছে মুছলমান শৰণাৰ্থী৷ তেওঁলোকৰ ঘৰ নাই৷ অবিৰত আক্ৰমণত ধ্বংস হৈ গৈছে আপোন ঘৰ৷ আত্মীয়য়ো ইতিমধ্যে পৃথিৱীৰ পৰা বিদায় মাগিছে৷ তথাপি ঈদ উদযাপন কৰিবলৈ সাজু হৈছিল তেওঁলোক৷ কিন্তু ৰমজান মাহতো তেওঁলোকে শান্তি নাপালে৷
এইসকল হৈছে গাজাপট্টীৰ বাসিন্দা৷ মুক্ত আকাশৰ তলৰ পিঞ্জৰাসদৃশ হৈ পৰা গাজাত অবিৰতভাৱে পৰিছে গোলা৷ আক্ৰমণকাৰীয়ে চহৰখন প্ৰায় ধ্বংস কৰিছে৷ সৰ্বস্ব হেৰুওৱাৰ পিছত চহৰবাসীৰ নাই জীয়াই থকাৰ ইচ্ছা৷ তেওঁলোক হৈ পৰিছে অথৰ্ব-বিধ্বস্ত৷ থাকিবলৈ ঘৰ নথকা লোকসকলৰ হাতত নাই সম্বল৷ কিন্তু প্ৰাণৰক্ষাৰ বাবে এই পৰিস্থিতিতো তেওঁলোক ঘৰৰ পৰা ওলাই গৈছে৷ আক্ৰমণকাৰীয়ে বাৰম্বাৰ ভাবুকি দিয়াৰ পিছত নিৰাপদ আশ্ৰয় বিচাৰি চহৰ ত্যাগ কৰিছে সাধাৰণ লোকে৷ তেওঁলোকে কিন্তু একো দোষ কৰা নাই৷ দুখন দেশৰহে সংঘাতৰ চিকাৰ হৈছে নিৰ্দোষী লোকসকল৷ কিন্তু সেইসকলেই প্ৰমাণ কৰিছে যুদ্ধৰ বিভীষিকা৷
খোজ কাঢ়িবলৈ অক্ষম বৃদ্ধয়ো চুঁচৰি-বাগৰি ত্যাগ কৰিছে ঘৰ৷ জীৱনে সৰ্বস্ব কাঢ়ি নিয়া লোকসকলৰ ঘৰ এৰি যাবলৈয়ো ইচ্ছা নাছিল৷ তথাপি তেওঁলোক নিৰূপায়৷ থিতাতে গৃহত্যাগ নকৰিলে প্ৰাণ কাঢ়ি লোৱাৰ হুমকি দিছে শত্ৰুৱে৷
সেয়ে ঘৰৰ পৰা ওলাই গৈছে তেওঁলোক৷ তথাপি তেওঁলোকৰ বাবে নাই নিৰাপদ আশ্ৰয়৷ তেওঁলোকৰ বাবে কোনেও পথত পাৰি থোৱা নাই ফুল৷
লাম-লাকটু সকলো বান্ধি তেওঁলোকে চহৰ এৰি ওলাই গৈছে৷ সঞ্চিত কিঞ্চিৎ সামগ্ৰী টোপোলা বান্ধি ক’ৰবালৈ গুচি গৈছে তেওঁলোক৷ কিন্তু তেওঁলোকেও নাজানে লক্ষ্যস্থান কি!
কাঁইটীয়া বাটেৰেই অনিশ্চিত ভৱিষ্যতৰ দিশে ৰাওনা হৈছে অথৰ্ব বৃদ্ধ৷ তেওঁলোক চকুত মাত্ৰ আছে বিভীষিকাৰ ছবি৷
কিন্তু ঈশ্বৰে ক’ব লাগিব- কি দোষ কৰিছিল এইসকল ভগনীয়াই? কিয় তেওঁলোকে হেৰুৱালে ঘৰ আৰু পুত্ৰ-কন্যাক?
0
