কেবাশ হেক্টৰ বিঘা মাটিত কৰা হৈছে এড়া গছৰ খেতি৷ আগতে অসমৰ বাটে-পথে গজি থকা গছবিধৰ বাণিজ্যিকভাৱে খেতি কৰিছে গুজৰাটীয়ে৷ প্ৰধানমন্ত্ৰীৰ গৃহৰাজ্যত অসমৰ পৰ নিয়া গুটিৰ জৰিয়তে গজোৱা হৈছে কেবালাখজোপা এড়া গছ৷ ইতিমধ্যে গুজৰাটত গঢ় লৈ উঠিছে এড়া গছৰ প্ৰকাণ্ড বাগিচা৷
অৱশ্যে এনেয়ে গুজৰাটীয়ে এড়া গছৰ খেতি কৰা নাই৷ অসমৰ পৰা এড়ী পলুৰ অধিকাৰ কাঢ়ি নিবলৈহে গুজৰাটত কৰা হৈছে গছবিধৰ খেতি৷ ৰাজ্যখনৰ শুকান পৰিৱেশত এড়ী পলু পালন সম্ভৱ নহয় বুলি ভবা হৈছিল৷ কিন্তু বৰ্তমান কৃষি বিজ্ঞানীয়ে অসম্ভৱকো সম্ভৱ কৰিছে৷
ইতিমধ্যে এড়ী পালনৰ দিশে প্ৰথমটো ঢাপত সফল হৈছে গুজৰাট৷ অসমৰ পৰা নিয়া সঁচৰ জৰিয়তে ৰাজ্যখনৰ বদোদৰা, ছুৰাট আৰু ৰাজকোটত এড়ী পলু পালন কৰা হৈছে৷ কৃত্ৰিমভাৱে সৃষ্টি কৰা এড়া গছৰ অৰণ্যত পালন কৰি থকা হৈছে অসমৰ পলু৷
চৰকাৰীভাৱেও তাৰ পালকসকলক সাহায্য প্ৰদান কৰা হৈছে৷ গতিকে অসমৰ এড়ী পলু পালন কৰিবলৈ তেওঁলোকে ধনৰ চিন্তা কৰিবলগীয়া হোৱা নাই৷ ৰাজসাহায্যৰে গুজৰাটীয়ে শিকি লৈছে এড়ী পলু পালনৰ কৌশল৷
অসৰ বিশেষজ্ঞৰ প্ৰশিক্ষণ অনুসৰি গুজৰাটৰ এড়াবাৰীত পলুৰ প্ৰতিপালন কৰা হৈছে৷ কিন্তু যদি তাত বাণিজ্যিকভাৱে এড়ী পলু পালন কৰা হয় তেন্তে অসমে সৰ্বস্ব হেৰুৱাব৷
গুজৰাটত এড়ী পলুৰ খেতি সফল হ’লেই অসমৰ পালকৰ একাধিপত্য নোহোৱা হৈ পৰিব৷ সম্ভৱতঃ অহা চাৰি বছৰৰ ভিতৰত গুজৰাটীয়ে বজাৰত উলিয়াই দিব পাৰিব এড়ী কাপোৰ৷ তাৰ পিছত অসমৰ পালকৰ নোহোৱা হ’ব গুৰুত্ব৷ গুজৰাটী পালকে বাণিজ্যিকভাৱে খেতি কৰি টন হিচাপত কাপোৰ বজাৰত এৰি দিব৷
গতিকে অসমৰ পালকৰ কাপোৰৰ বজাৰত নোহোৱা হ’ব গুৰুত্ব৷ এই দিনটোলৈ বেছিদিন বাকী নাই৷
0
