মৰা গাহৰিৰ মাংসৰে উভৈনদী হৈ পৰিছে বজাৰ৷ বিশেষকৈ শিৱসাগৰৰ হালোৱাটিং আৰু সমীপৱৰ্তী এলেকাত বিক্ৰী কৰা বেছিভাগ মাংসই হৈছে মৰা গাহৰিৰ৷ বৰ্হিৰাজ্যৰ পৰা অনা গাহৰি বেমাৰী হৈ মৰাৰ পিছত অসমীয়াক মাংস বিক্ৰী কৰা হৈছে৷
অৱশ্যে শেহতীয়াকৈ গাহৰি পালকে সেই এলেকাৰ মৰা গাহৰি বিক্ৰী নকৰাৰ সিদ্ধান্ত লৈছে৷ কিন্তু আন প্ৰান্ততো বিক্ৰী হৈ আছে বেমাৰ হৈ মৰা গাহৰিৰ মঙহ৷
প্ৰাপ্ত তথ্য অনুসৰি বৰ্হিৰাজ্যৰ পৰা অনাৰ সময়ত বেমাৰত আক্ৰান্ত হৈ গাহৰি মৰে৷ সেইবোৰ প্ৰথমে নাগালেণ্ডত নমোৱা হয়৷ তাৰ পিছত অসমৰ ভিন্ন ঠাইলৈ দিয়া হয় চালান৷
আনকি ডিব্ৰুগড়ৰ কেবাঠাইতো বেমাৰী হাইব্ৰিড গাহৰিৰ মাংস বিক্ৰী কৰা হৈছে৷ অৱশ্যে কেৱল নাগালেণ্ডৰ পৰাই নহয়, অসমৰো ভিন্ন ঠাইৰ পৰা চহৰ এলেকালৈ নিয়া হৈছে মৰা গাহৰিৰ মাংস৷
বৰ্তমান অসমলৈ পঞ্জাব আৰু হাৰিয়ানাৰ পৰা সদায় আহি আছে হাইব্ৰিড গাহৰি৷ এইবোৰ যাত্ৰাকালতে বেমাৰী হৈ মৰাটো স্বাভাৱিক হৈ পৰিছে৷ কিন্তু নমোৱাৰ সময়ত বেমাৰী গাহৰি আছুতীয়াকৈ ৰখা নহয়৷
সেইবোৰ ততালিকে বিক্ৰী কৰাৰহে ব্যৱস্থা কৰে ব্যৱসায়ীয়ে৷ উজনিৰ যিকেইখন জিলাত সৰ্বাধিক গাহৰি মাংস বিক্ৰী হয় তাত নমোৱাৰ পিছতে প্ৰথমে মৰা গাহৰিৰ মাংসই বিক্ৰী কৰা হয়৷
তাৰ পিছতহে ব্যৱসায়ীয়ে চাহিদা আনুসৰি সুস্থ গাহৰিৰ মাংস বিক্ৰী কৰে৷ দীৰ্ঘদূৰত্ব অতিক্ৰম কৰাৰ সময়ত বেমাৰী হোৱা গাহৰিৰ মাংসৰ সৈতে অসমৰ ভোজনবিলাসীয়ে খাইছে বিভিন্ন বেমাৰৰ বীজাণু৷
ভাইৰাছৰ বাহ হৈ পৰা গাহৰি মাংসই অসমীয়া ভোজনবিলাসীয়ে নিসংকোচে ধন ভৰি খাইছে৷ তেওঁলোকে গমেই পোৱা নাই বেমাৰী গাহৰিৰ মাংস খোৱাৰ কথা৷
অসমত ছোৱাই ফিভাৰ বিয়পিলেই চৰকাৰে গাহৰি মাৰিবলৈ পালকক বাধ্য কৰে৷ একেসময়তে কিন্তু বৰ্হিৰাজ্যৰ বেপাৰীয়ে অসমলৈ আনে বেমাৰী গাহৰি৷ বাটতে মৰা গাহৰিৰো মাংস অসমীয়াক বিক্ৰী কৰে৷
0
