গুৱাহাটীৰ পৰা গুচি যাব দুটা বিখ্যাত শ্বপিং মল৷বেপাৰ মন্দা হৈছে, সেয়ে গুৱাহাটীৰ লগতে আন চহৰৰো মল বন্ধ কৰিবলৈ দুয়োটা প্ৰতিষ্ঠা সিদ্ধান্ত গ্ৰহণ কৰিছে৷ কৰ্মচাৰীৰ দৰমহাৰ সৈতে সামগ্ৰিক পৰিচালনাৰ খৰচ বৃদ্ধিৰ ফলশ্ৰুতিত লোকচান হৈছে শ্বপিং মলৰ৷ সেয়ে দুয়োটা পুৰণি প্ৰতিষ্ঠানে অসমত ব্যৱসায় সমাপ্ত কৰাটোৱেই উচিত বুলি গণ্য কৰিছে৷
ৰাজ্যৰ প্ৰায়বোৰ চহৰতে বৰ্তমান অভাৱনীয় হাৰত হ্ৰাস পাইছে মলৰ গ্ৰাহক৷ গুৱাহাটীতে শ্বপিং মলৰ গ্ৰাহক ৭০ শতাংশ কমিছে৷ সন্ধ্যা পূৰ্বে গ্ৰাহকেৰে গিজগিজাই থকা মলৰ পৰিৱেশ বৰ্তমান নিস্তব্ধ৷
কিন্তু সেই অনুপাতে খৰচ হ্ৰাস কৰিব পৰা নাই কৰ্তৃপক্ষই৷ বিশালৰ বাদে আন সকলো মলতে পৰিচালনাৰ খৰচ বাঢ়িছে৷ পিছে কমিছে বিক্ৰী৷ সেয়ে জোৰা মাৰিব পৰা নাই কৰ্তৃপক্ষই৷
উপায়ন্তৰ হৈ তেওঁলোকে অসমেই ত্যাগ কৰিবলৈ ওলাইছে৷ সাম্প্ৰতিক পৰিস্থিতিয়ে গ্ৰাহক মন্দাৱস্থা যে অনিবাৰ্য সেয়াও নিশ্চিত কৰি দিছে৷ শ্বপিং মলৰ কৰ্তৃপক্ষ কৰা বিশ্লেষণ অনুসৰি লাহে লাহে অসমৰ গ্ৰাহকৰ ক্ৰয় ক্ষমতা কমিছে৷ হাতত নোহোৱা হৈছে খৰচ কৰিব পৰা পইচা৷
ভূতৰ ওফৰত দানহ পৰাদি পৰিছে অনলাইন বজাৰ৷ প্ৰায়বোৰ সামগ্ৰী কম দামতো পোৱাৰ লোভত অনলাইনৰ পৰা কিনিবলৈ লৈছে গ্ৰাহকে৷ সেয়ে শ্বপিং মলৰ নোহোৱা হৈছে সদাপৰিচিত ব্যস্ততা৷
গতিকে লোকচানৰ পৰা পৰিত্ৰাণ পাবলৈ শ্বপিং মলেই বন্ধ কৰি দিবলৈ ওলাইছে কৰ্তৃপক্ষ৷ তেওঁলোকে কিছুদিনৰ ভিতৰতে অসম ত্যাগ কৰাটো নিশ্চিত কৰিছে৷
0
