হিন্দুৰ উৎসৱত মিঞাক দোকান দিবলৈ নিদিয়ে৷ কিন্তু অভাৰব্ৰীজ সাজিবলৈ মিঞা নহ’লেই নচলে৷
গুৱাহাটীৰে চানমাৰি কলনিত নিৰ্মাণ কৰি থকা হৈছে অভাৰব্ৰীজ৷ সদায় নিশা তাত দুৰ্বাৰ গতিত কাম চলি আছে৷ কিন্তু শ্ৰমিকসকলৰ মাজত দৰৱত দিবলৈয়ো খিলঞ্জীয়া যুৱক এজনো নাই৷ জনজাতীয় যুৱকো সেইসকল শ্ৰমিকৰ মাজত নাই৷ অভাৰব্ৰীজ সাজি থকা সকলো শ্ৰমিক হৈছে মিঞা৷
ঠিকাদাৰৰ অধীনত কেবাশ মিঞা শ্ৰমিকে সেই প্ৰকল্পত কাম কৰি আছে৷ ৰমজানৰ সময়তো কাম বন্ধ হোৱা নাই৷ তেওঁলোকে ছেহৰীৰ সময়তে অভাৰব্ৰীজ নিৰ্মাণৰ কাম বন্ধ কৰিছে৷
গুৱাহাটীত গাড়ীৰ ভিৰ কমাৰ সময়ৰ পৰা ছেহৰীপৰ্যন্ত কাম কৰে মিঞা শ্ৰমিকে৷ বেছিকৈ পৰিশ্ৰম কৰিব পাৰে বাবে মিঞা বনুৱাক পছন্দও কৰে অভিযন্তাই৷ সেয়ে মিঞা শ্ৰমিক গোটাবলৈ নিৰ্দেশ দিয়ে ঠিকাদাৰক৷
অৱশ্যে কেৱল গুৱাহাটীতে নহয়, ৰাজ্যত নিৰ্মাণ চলি থকা সকলো অভাৰব্ৰীজতে কাম কৰি আছে মিঞা শ্ৰমিকে৷ তেজপুৰৰ অভাৰব্ৰীজখনৰ ৯৫ শতাংশ বনুৱাই হৈছে মিঞা৷ স্থানীয় শ্ৰমিকৰ উপৰি তাত নিয়োজিত হৈ আছে বৰপেটা আৰু ধুবুৰীৰ শ্ৰমিক৷
কামৰ প্ৰতি থকা বিশ্বাসৰ বাবে যোৰহাট আৰু ডিব্ৰুগড়তো ঠিকাদাৰে মিঞা শ্ৰমিকহে নিয়োগ কৰিছে৷ তেওঁলোকে কম সময়ৰ ভিতৰতে কৰিব পাৰে বেছিকৈ কাম৷ লগতে মিঞা শ্ৰমিকক থকা-খোৱাৰ বাবেও বিলাসী ব্যৱস্থা নালাগে৷ তৰ্জাৰ ঘৰতে তেওঁলোকৰ ৰাখিব পাৰি৷
সেয়ে খৰচ কম হয়৷ যাৰ বাবে মিঞা শ্ৰমিকেই হৈ পৰিছে অগতিৰ গতি৷ ৰাজ্যত বৰ্তমান চলি থকা ষ্টেডিয়াম নিৰ্মাণতো মিঞা শ্ৰমিকেই নিয়োগ কৰা হৈছে৷
ক্ৰিকেট ষ্টেডিয়ামৰ কামত নিয়োজিত বেছিভাগ শ্ৰমিকেই হৈছে ধুবুৰীৰ মিঞা৷ বৰপেটা আৰু গোৱালপাৰাৰ মিঞা বনুৱাক ডিব্ৰুগড়ৰ উপৰি যোৰহাটতো নিয়োগ কৰিছে ঠিকাদাৰে৷
কিন্তু একেসময়তে অশোক সিংহলে মিঞাক ধৰ্মীয় উৎসৱত দোকান দিয়াৰ পৰা বাৰণ কৰিবলৈ আহ্বান জনাইছে৷ পিছে পৰিশ্ৰমী মিঞা নহ’লে নচলা হৈছে নিৰ্মাণকাৰ্য৷
0
