ৰিয়ানৰ জৰিয়তে অমৃত লগ্নত উপনীত অসম ক্ৰিকেট

আঘাতগ্ৰস্ত সঞ্জু ছেমছনে নেখেল, গতিকে ৰাজস্থান ৰয়েলছৰ কেপ্টেইন হ’ব ৰিয়ান পৰাগ৷ অসমৰ প্ৰথম ক্ৰিকেটাৰ হিচাপে IPL ফ্ৰেন্সাইজীক নেতৃত্ব প্ৰদানৰ গৌৰৱৰ অধিকাৰী হ’ব ৰিয়ান পৰাগ৷
বিগত ছিজনত ৬ শতাধিক ৰান স্ক’ৰ কৰা ৰিয়ান অৱশ্যে আঘাতৰ বাবে দীৰ্ঘদিন খেলপথাৰৰ পৰা আঁতৰি আছিল৷ কিন্তু প্ৰত্যাৱৰ্তন কৰিয়েই আকৌ ধুমুহাৰ সৃষ্টি কৰিছে ৰিয়ানে৷
গুৱাহাটী আৰু জয়পুৰত ৰাজস্থান ৰয়েল্‌ছৰ অনুশীলনত অংশ লৈছে ৰিয়ান পৰাগে৷ শেহতীয়াকৈ ছৱাই মানসিং ষ্টেডিয়ামৰ অনুশীলন মেচত বিস্ফোৰক ইনিংছ খেলিছে অসমৰ তাৰকাজনে৷
মেচখনত ৰিয়ানে মাত্ৰ ৬৪ টা বলৰ সন্মুখীন হৈ অপৰাজিত ১৪৪ ৰান স্ক’ৰ কৰিছে৷ ৰিয়ানৰ বিস্ফোৰক শতকীয় ইনিংছত আছিল ১০ ছিক্সাৰ আৰু ১৬ টা বাউণ্ডেৰী৷
ছৱাই মানসিং ষ্টেডিয়ামৰ ধুমুহাৰ বাবে ৰিয়ানক লৈ সুকীয়া ৰণনীতি প্ৰস্তুত কৰিবলৈ ৰাজস্থান ৰয়েল্‌ছ সাজু হ’ল৷
অনুশীলন মেচত বলাৰক বিধ্বস্ত কৰা ৰিয়ানে কেবাগৰাকী বিদেশী ক্ৰিকেটাৰকো IPLত নেতৃত্ব প্ৰদান কৰিব৷ তেওঁৰ অধীনতে খেলিব যশস্বী জয়ছোৱাল, ৱানিন্দু হাছৰাংগা আৰু ছিমৰন হেটমায়াৰে৷
সূচী অনুসৰি ২৬ আৰু ৩০ মাৰ্চত গুৱাহাটীত খেলিব ৰাজস্থান ৰয়েলছে৷ ইতিমধ্যে মেচ দুখনৰ বাবে অফলাইন টিকট কাউণ্টাৰো মুকলি কৰা হৈছে৷ গতিকে গুৱাহাটীত আৰম্ভ হৈছে IPL জ্বৰ৷
লোকেল বয়ৰ নেতৃত্বত ৰাজস্থানে গুৱাহাটীত খেলি আৰম্ভ কৰিব IPL অভিযান৷ এয়াই অসম ক্ৰিকেটৰ বাবে অমৃতক্ষণ৷

Please follow and like us:

0