ভূমিৰ অধিকাৰক লৈ পৃথিৱীত যুদ্ধৰ অন্ত নাই৷ ইউক্ৰেইনৰ বিৰুদ্ধে ৰাছিয়া অথবা ইৰানৰ বিৰুদ্ধে আমেৰিকাই অহৰহ যুঁজিয়েই আছে৷ কিন্তু মাত্ৰ ৪০০ কিলোমিটাৰ ওপৰতে চলি থকা আন্ত:ৰাষ্ট্ৰীয় মহাকাশ কেন্দ্ৰত প্ৰভাৱ নপৰে পৃথিৱীৰ অশান্তিৰ৷
মহাশূন্যত পৃথিৱীৰ দৰে ক্ষমতাৰ বাবে নাই অঁৰিয়াঅৰি৷ সেয়ে সুনীতা উইলিয়ামছে ওভতনিৰ সময়ত আই এছ এছৰ কমাণ্ডাৰৰ দায়িত্ব চমজাই দিছে ৰাছিয়াৰ নভোচৰ এলেক্সি অভচিনিনৰ হাতত৷ নাছাৰ মাৰ্কিন নভোচৰ সুনীতা উইলিয়ামছে ৰাছিয়াৰ ৰছকছমছৰ এলেক্সি অভচিনিনৰ হাতত আই এছ এছ অৰ্থাৎ মহাকাশ কেন্দ্ৰৰ পৰিচালনাৰ দায়িত্ব সেইবাবেই অৰ্পণ কৰিছে৷
অৱশ্যে সুনীতা উইলিয়ামছ আৰু কমাণ্ডিং পাইলট বুচ্চ উইলম’ৰে বয়িং কোম্পানীৰ ষ্টাৰলাইনাৰ নামৰ স্পেচক্ৰাফটখন মহাকাশ ষ্টেচনলৈ চলাই লৈ গৈছিল পৰীক্ষামূলকভাৱে। যদিহে সেই পৰীক্ষামূলক ড্ৰাইভ নিখুঁত হয়, তেন্তে ভৱিষ্যতৰ ‘স্পেচক্ৰাফট’ হিচাপে ‘ষ্টাৰশ্বিপ’ৰ দৰে মহাকাশলৈ যাতায়ত কৰিব বয়িঙৰ মহাকাশযানেও।
কিন্তু যোৱাৰ পথতে ‘ষ্টাৰলাইনাৰ’ৰ থ্ৰাষ্ট যন্ত্ৰত বিজুতি ওলোৱাৰ লগতে মহাকাশযানখনৰ পৰা হিলিয়াম গেছো নিৰ্গত হ’ল। কোনোমতে দুয়ো ষ্টাৰলাইনাৰ আই এছ এছত ডকিং কৰিলে যদিও নাছাই তেওঁলোকক সেইখনত উভতি আহিবলৈ অনুমতি নিদিলে। তেতিয়াৰ পৰা মহাকাশবাসী হৈ আছে দুয়োগৰাকী মহাকাশচাৰী৷ কেবাখনো দেশৰ যৌথ প্ৰযুক্তিৰে নিৰ্মিত আই এছ এছ আছে লিঅ’ অৰ্থাৎ ল’ আৰ্থ অৰবিটত৷
এই প্ৰদক্ষিণ পথত মহাকৰ্ষণ শক্তি বেছি৷ সেয়ে যিকোনো মুহূৰ্ততে আই এছ এছ পৃথিৱীলৈ খহি পৰিব পাৰে৷ তেনে ঘটনা যাতে নঘটে সেয়ে আই এছ এছ দ্ৰুতগতিৰে পৃথিৱীৰ চাৰিফালে ঘূৰি থাকে৷ ঘণ্টাত ২৮ হাজাৰ কিলোমিটাৰ বেগত আই এছ এছে পৃথিৱীক প্ৰদক্ষিণ কৰে৷ অর্থাৎ দিনে ১৬ বাৰ পৃথিৱীৰ চৌপাশে ঘূৰ্ণন কৰে আই এছ এছে৷ এই যানখনতে নমাহ জীৱন কটালে সুনীতা উইলিয়ামছে৷
0
