গামোচাৰ প্ৰতি এলাৰ্জী আছে গৃহমন্ত্ৰীৰ
গামোচা কেতিয়াও নিপিন্ধে অমিত শ্বাহে৷ অসমলৈ আহিলেও তেওঁ ডিঙিত গামোচা নলয়৷ আদৰণি জনাই পিন্ধোৱাৰ পূৰ্বেই গামোচাখন কাঢ়ি লয় কেন্দ্ৰীয় গৃহমন্ত্ৰীয়ে৷ এইবাৰো পূৰ্বৰ দৰেই ডিঙিৰ সলনি হাততে ল’লে গামোচা৷ তাৰ পিছতে বডীগাৰ্ডলৈ অসমৰ গামোচা দলিয়াই দিলে অমিত শ্বাহে৷
এইবাৰ দিল্লীৰ পৰা আহি অমিত শ্বাহে ৰৰৈয়া বিমান বন্দৰত অৱতৰণ কৰিছিল৷ তেতিয়াই তেওঁক আদৰণি জনাইছিল মুখ্যমন্ত্ৰীয়ে৷
কিন্তু পূৰ্বৰ দৰেই এইবাৰো অমিত শ্বাহে মুখ্যমন্ত্ৰীক গামোচা পিন্ধাবলৈ নিদিলে৷ শিপিনীয়ে বোৱা দৰা বৰণৰ গামোচা মুখ্যমন্ত্ৰীয়ে লৈ গৈছিল৷ পিছে ডিঙিত পিন্ধোৱাৰ পূৰ্বেই অমিত শ্বাহে থপিয়াই ল’লে গামোচাখন৷
একেদৰে ফুলৰ তোৰাও আগতেই লৈ ল’লে গৃহমন্ত্ৰীয়ে৷ মুখ্যমন্ত্ৰীৰ পৰা কাঢ়ি লোৱাৰ দৰেই গামোচা আৰু ফুলৰ তোৰা লৈ থ’লে অমিত শ্বাহে৷
অৱশ্যে এইবাৰেই প্ৰথম তেওঁ তেনে আচৰণ কৰা নাই৷ পূৰ্বেও গৃহমন্ত্ৰীয়ে ডিঙিত পিন্ধাবলৈ দিয়া নাছিল গামোচা৷ অজ্ঞাত কাৰণত তেওঁ আগতীয়াকৈ থপিয়াই লৈছিল অসমৰ সন্মানৰ প্ৰতীক৷
এই বিষয়টো কিন্তু বিজেপিৰ শীৰ্ষ মহলতো আলোচ্য হৈ পৰিছে৷ কি জগৰত গৃহমন্ত্ৰীয়ে ডিঙিত গামোচা নিপিন্ধে বুলি প্ৰশ্ন কৰিছে শীৰ্ষ নেতাই৷ কিন্তু প্ৰধানমন্ত্ৰীয়ে গামোচাৰ প্ৰতি থকা আদৰৰ কথা বিভিন্ন ঠাইত ব্যক্ত কৰিছে৷ তেওঁৰে সহকাৰীয়ে আকৌ থপিয়াই লৈছে গামোচাখন৷
0
