আমেৰিকাত চাকৰি দিয়াৰ লোভ দেখুৱাই কৰিলে বন্দী

কল চেণ্টাৰত বন্দী হৈ আছে অসমৰ যুৱক-যুৱতী৷ ফোন কৰি পুৰস্কাৰ জিকাৰ দৰে প্ৰতাৰণাৰ চেষ্টা কৰা বহুতে বাধ্যত পৰিহে তেনেকুৱা কাম কৰিছে৷ বিদেশৰ পৰা ফোন কৰি সাধাৰণ লোকৰ প্ৰবঞ্চনা কৰিবলৈ চেষ্টা কৰা অসমীয়া যুৱক-যুৱতীক বন্দী কৰি থৈছে মাফিয়াই৷ বৰ্তমান ম্যানমাৰৰ পৰা এদল তৰুণক চৰকাৰে ওভতাই আনিছে৷ কিন্তু বহুতো এতিয়াও হৈ আছে বন্দী৷
এইসকল কল চেণ্টাৰত কাম কৰিবলৈ বন্দী হৈ পৰাৰ আঁৰত এটা কাহিনী আছে৷
অসমৰ মেধাৱী যুৱকক কেইবছৰমান পূৰ্বেই বিদেশত চাকৰিৰ প্ৰলোভন দিছিল এটা চক্ৰই৷ আমেৰিকা অথবা ইউৰোপত তেওঁলোকক লোভনীয় দৰমহাৰে চাকৰি দিম বুলি লৈ গৈছিল মাফিয়াৰ এজেণ্টে৷ তাৰ বাবে যুৱকসকলৰ পৰা লোৱা হৈছিল মাচুল৷
সেইসকলক প্ৰথমে অসমৰ পৰা নি কুৱালালামপুৰত নমোৱা হয়৷ তাৰ পৰাহে বিদেশৰ বিমানেৰে নিয়াৰ লোভ দেখুৱাই কেইদিনমান ফাইভষ্টাৰ হোটেলতো ৰখা হয়৷
কিন্তু তেতিয়াই মাফিয়া চক্ৰৰ আচৰণ সলনি হৈ পৰে৷ সেই মাফিয়াৰ দলটোৱে মালয়েছিয়াৰ পৰা স্থলপথেৰে ভয়-ভাবুকিৰে অসমৰ যুৱকক ম্যানমাৰলৈ নিয়ে৷
চোৰাংকৈ সীমান্ত পাৰ কৰোৱাৰ পিছত কল চেণ্টাৰত কাম কৰিবলৈ বাধ্য কৰোৱা হয় প্ৰলোভনৰ জালত বন্দী হোৱা যুৱকসকলক৷ অটব্য অৰণ্যৰ মাজৰ অচিনাকি ঠাইত থকা কল চেণ্টাৰৰ পৰা ওলায় আহিব নোৱাৰে অসমৰ যুৱক৷ তেওঁলোকৰ পৰা মাফিয়াই কাঢ়ি লয় একাডেমিক চাৰ্টিফিকেট৷
সেই কল চেণ্টাৰৰ পৰা চলি থাকে নিষিদ্ধ কাৰ্যাৱলী৷ চাকৰিয়ালক প্ৰতাৰণাৰ জাল মেলিবলৈ বাধ্য কৰায় কল চেণ্টাৰৰ মালিকে৷
বাধ্যত পৰি তাৰ পৰাই সাধাৰণ ৰাইজলৈ ফোন কৰি লটাৰী জিকা অথবা এয়াৰটেলৰ টাৱাৰ সজাৰ দৰে প্ৰস্তাৱেৰে বহুতলৈ ফোন কৰে বন্দী কৰ্মচাৰীয়ে৷

Please follow and like us:

0