কষ্ট হ’ব, কিন্তু ৰোজা ধৰিব মহম্মদ ছামীয়ে৷ চেম্পিয়নছ ট্ৰফীৰ ফাইনেলত ভাৰতৰ পেচাৰজনে উপবাস পালন কৰিব৷ ৰমজানৰ নিয়ম মানি ফাইনেলত ৰোজা ধৰিব ছামীয়ে৷ টীম ইণ্ডিয়াৰ সূত্ৰই সদৰী কৰা মতে খেলা নথকা দিনত ছামীয়ে ৰোজা পালন কৰিছে৷ কিন্তু তেওঁ শেহতীয়াকৈ ছেমি ফাইনেলত শাৰিৰীক দুৰ্বলতাৰ বাবে ৰোজা ধৰিব নোৱাৰিলে৷ পিছে নিউজিলেণ্ডৰ বিপক্ষে ফাইনেলত ছামীয়ে ৰোজা পালন কৰিয়েই অংশগ্ৰহণ কৰিব৷ বিদেশৰ ফুটবলাৰে যেনেকৈ ৰোজা ৰাখিয়েই খেলে, তেনেকৈয়ে ছামীয়েও ৰমজানৰ উপবাস পালন কৰিয়েই ফাইনেল খেলিব৷ অৱশ্যে তেওঁৰ ৰোজাক কেন্দ্ৰ কৰি সৃষ্টি হোৱা বিতৰ্কৰ বাবে ছামীয়ে এই সিদ্ধান্ত লোৱা নাই৷ বৰ্তমান শাৰিৰীকভাৱে সম্পূৰ্ণ সুস্থ বাবেহে তেওঁ ৰোজা পালন কৰিয়েই ফাইনেল খেলিবলৈ ইচ্ছা কৰিছে৷ অৱশ্যে ছামীয়ে ৰোজা পালন কৰা অথবা নকৰাৰ বিষয়ত কোনো আপত্তি নাই বুলি প্ৰকাশ কৰিছে টীম মেনেজমেণ্টে৷ এই বিষয়ে সিদ্ধান্ত গ্ৰহণ কৰিবলৈ ছামীকে ৰোহিত শৰ্মাই কৰ্তৃত্ব প্ৰদান কৰিছে৷ কিন্তু সকলোকে ৰোজা ৰাখিব বুলি মহম্মদ ছামীয়ে জনাই দিছে৷ দীঘলীয়া কেৰিয়াৰত ইতিমধ্যে ৰমজানৰ উপবাস পালন কৰিয়েই ছামীয়ে কেবাবাৰো ক্ৰিকেট খেলিছে৷ কিন্তু এইবাৰ তেওঁ শাৰিৰীক সমস্যাৰ বাবে ছেমি ফাইনেলত ৰোজা পালনৰ ইচ্ছা কৰা নাছিল৷ কিন্তু ফাইনেলত দেশৰ বিজয়ৰ বাবে ইবাদত কৰি ছামীয়ে ৰোজা পালন কৰিব৷ খালী পেটেৰে তেওঁ ফিল্ডত নামিব৷
0
