দেওবাৰে কেৰিয়াৰৰ অন্তিমখন এদিনীয়া মেচ খেলিব ৰোহিত শৰ্মাই৷ চেম্পিয়নছ ট্ৰফীৰ ফাইনেলৰ পিছতে ৰোহিতে সমাপ্ত কৰিব এদিনীয়া কেৰিয়াৰ৷ দলক ফাইনেললৈ নিয়াৰ কৃতিত্ব অৰ্জন কৰা ৰোহিতে ডুবাই ইণ্টাৰনেশ্যনেল ক্ৰিকেট ষ্টেডিয়ামতে অৱসৰ ঘোষণা কৰিব৷ পত্নী ঋতিকা আৰু কন্যা-পুত্ৰৰ সৈতে থিয় হৈ ৰোহিতে ঘোষণা কৰিব অৱসৰ৷
অৱশ্যে ৰোহিতৰ অৱসৰক লৈ কালিলৈ BCCIয়ে স্থিতি স্পষ্ট কৰা নাছিল৷ কিন্তু টীম ইণ্ডিয়াৰ অধিনায়কে অৱসৰ চূড়ান্ত কৰা বুলি সম্প্ৰতি ব’ৰ্ডে প্ৰকাশ কৰিছে৷ চেম্পিয়নছ ট্ৰফীৰ পিছতে দলৰ বাবে নতুন অধিনায়ক বিচাৰিবলৈয়ো ৰোহিতে নিৰ্বাচক কমিটীক জনাইছে আহ্বান৷
খবৰ মতে ৰোহিতে ব’ৰ্ডৰ সভাপতি ৰ’জাৰ বিন্নী আৰু সচিব দেৱজিৎ শইকীয়াক অৱসৰৰ সিদ্ধান্তৰ বিষয়ে জনাই দিছে৷ তেওঁ সিদ্ধান্তৰ বিষয়ে কথা পাতিছে মুখ্য নিৰ্বাচক অজিত আগৰকাৰৰ সৈতেও৷
কিন্তু তেওঁলোকে কোহলি আৰু ৰবীন্দ্ৰ জাদেজাৰ লগতে অৱসৰৰ ঘোষণা নকৰিবলৈ ৰোহিতক অনুৰোধ কৰিছিল৷ কিন্তু চেম্পিয়নছ ট্ৰফী জিকিব পাৰিলেই বিদায় ল’ব বুলি তেওঁলোকক জনাই দিছে ৰোহিতে৷
এতিয়াই কেৰিয়াৰৰ মোখনি মাৰিবলৈ উত্তম সময় বুলি ৰোহিতে বিবেচনা কৰিছে৷ তদুপৰি মেদবহুল স্বাস্থ্যৰ বাবে সমালোচনাৰ সন্মুখীন হোৱাৰ বাবেও আঘাত পাইছে ৰোহিতে৷ গতিকে তেওঁ ফিটনেছৰ বাবেও অৱসৰ নিশ্চিত কৰিছে৷
সেয়ে বৰ্তমান নিশ্চিত হৈছে- ৰোহিতে দেওবাৰে ঘোষণা কৰিব অৱসৰ৷ চেম্পিয়নছ ট্ৰফীৰ পিছত কোহলি আৰু জাদেজাৰ উপৰি ৰোহিতেও খেলিব কেৱল এদিনীয়া ক্ৰিকেট৷
0
