অষ্ট্ৰেলিয়াক নহৰুৱাকৈ ICC কাপ জিকিব নোৱাৰি। কিন্তু ২০২৩ৰ নৱেম্বৰত ভাৰত আৰু অষ্ট্ৰেলিয়াই খেলিছিল বিশ্বকাপৰ ফাইনেল৷ ডেৰবছৰৰ ব্যৱধানত দুয়োযা দল চেম্পিয়নছ ট্ৰফীৰ ছেমিত মুখামুখি হ’ব৷
এদিনীয়া বিশ্বকাপৰ ফাইনেলত পৰাজয়ৰ প্ৰতিশোধৰ লক্ষ্যৰে শক্তি প্ৰদৰ্শন কৰিবলৈ সাজু হৈছে টীম ইণ্ডিয়া৷ এইবাৰো অষ্ট্ৰেলিয়াৰ সন্মুখীন হোৱাৰ পূৰ্বে লীগত অজেয় হৈ আছে ভাৰত৷
ডুবাইৰ পিটচত এইপৰ্যন্ত আধিপত্য প্ৰদৰ্শন কৰিছে স্পীনাৰে৷ মৰুদেশত এখনো এদিনীয়াত ভাৰত পৰাস্ত হোৱা নাই৷
অৱশ্যে ডুবাইত প্ৰথমবাৰৰ বাবে টীম ইণ্ডিয়াই অষ্ট্ৰেলিয়াৰ বিৰুদ্ধে খেলিব৷
লেহেমীয়া পিট্চৰ উপযোগী হোৱাকৈ ভাৰতীয় দলত আছে ৫ গৰাকী বিশেষজ্ঞ স্পীনাৰ৷ অষ্ট্ৰেলিয়াৰ এডাম জাম্পাৰ ৰূপত এগৰাকী অভিজ্ঞ স্পীনাৰ আছে যদিও উদীয়মান তনবীৰৰ নাই অভিজ্ঞতা৷ মাত্ৰ ৩খন এদিনীয়া খেলিছে তনবীৰে৷
টীম ইণ্ডিয়াৰ কুলদীপ যাদৱ, অক্ষৰ পেটেল আৰু ৰবীন্দ্ৰ জাদেজাই তিনিওখন মেচত সুন্দৰ প্ৰদৰ্শন কৰিছে৷ গতিকে বলিঙত নাই ভাৰতৰ সমস্যা৷ ফৰ্মত আছে টীম ইণ্ডিয়াৰ বেট্ছমেনো৷ ৩খন খেলত ২টাকৈ শতক অৰ্জন কৰিছে ভাৰতীয় বেট্ছমেনে৷
কিন্তু বিগ মেচত অষ্ট্ৰেলিয়া সদায়েই বিপজ্জনক৷ কিন্তু এদিনীয়া বিশ্বকাপৰ দৰে দলটোত নাই পেট কামিন্স, মিছেল ষ্টাৰ্ক, হেজেলউড৷
তাৰকাবিহীন হ’লেও অষ্ট্ৰেলিয়াক দুৰ্বল বুলি ভবাটো ভাৰতৰ ভুল হ’ব৷ বিশেষকৈ ট্ৰেভিছ হেড আৰু ষ্টিভ স্মিথ ভাৰতৰ বাবে হৈ পৰিব পাৰে মূৰৰ কামোৰণি৷
পিটচৰ গতি-গোত্ৰলৈ লক্ষ্য কৰি প্ৰথমে বেটিং কৰা দলৰে সম্ভাৱনা অধিক বুলি ব্যক্ত কৰিছে ক্ৰিকেট বিশেষজ্ঞই৷ কিন্তু অষ্ট্ৰেলিয়াক ৰোধিবলৈ টীম ইণ্ডিয়াই কেনে পৰিকল্পনা প্ৰস্তুত কৰে তাৰ ওপৰতো নিৰ্ভৰ কৰিব মঙলবৰীয়া সন্ধ্যাৰ ৰেহ-ৰূপ৷
0
