ৰাজ্যৰ মহাধিবক্তা দেৱজিৎ শইকীয়া BCCIৰ সচিব পদত অধিষ্ঠিত হ’ল৷ তেওঁ বৰ্তমান দেশৰ দ্বিতীয় শীৰ্ষ ক্ৰিকেট প্ৰশাসক৷ কিন্তু একেসময়তে শইকীয়াই অসম চৰকাৰৰো মহাধিবক্তা হিচাপে এইপৰ্যন্ত কাৰ্যনিৰ্বাহ কৰি আছে৷ পিছে BCCIৰ নিয়ম অনুসৰি কোনো বিষয়া অথবা কৰ্মচাৰীয়ে একেলগে দুটা পদত কাৰ্যনিৰ্বাহ কৰিব নোৱাৰে৷ সেয়ে গৌতম গম্ভীৰে টীম ইণ্ডিয়াৰ প্ৰশিক্ষক হোৱাৰ বাবে কলকাতা নাইট ৰাইডাৰ্ছৰ মেণ্টৰ পদ ত্যাগ কৰিছিল৷ BCCIৰ সংস্কাৰৰ বাবে ৰাজেন্দ্ৰ লোধা কমিটীৰ পৰামৰ্শ অনুসৰি বেতন পোৱা দুটা পদত একেজন ব্যক্তি থাকিব নোৱাৰে৷ যদি থাকে তেন্তে সেয়া কনফ্লিক্ট অৱ ইণ্টাৰেষ্ট অথবা স্বাৰ্থৰ সংঘাত হয়৷ গতিকে শীঘ্ৰে দেৱজিৎ শইকীয়াই অসম চৰকাৰৰ মহাধিবক্তা পদ এৰিব লাগিব৷ তেওঁ ইস্তফা দিলে উক্ত পদত কোন অধিষ্ঠিত হ’ব তাৰ চৰ্চা ইতিমধ্যে আৰম্ভ হৈছে বৰ্তমান মহাধিবক্তা পদৰ বাবে চৰ্চাত আছে নেকিবুৰ জামান প্ৰবীণ অধিবক্তাগৰাকী বৰ্তমান হজ কমিটীৰ সভাপতি আদালতত যুক্তি প্ৰদৰ্শনৰ দিশত তেওঁৰ প্ৰায় ৪০ বছৰীয়া অভিজ্ঞতা আছে তদুপৰি তেওঁ প্ৰভাৱশালী পক্ষৰো ঘনিষ্ঠ বুলিয়েই জনাজাত মুখ্যমন্ত্ৰীয়ে খিলঞ্জীয়া মুছলমান সংগঠনৰ সৈতে অনুষ্ঠিত কৰা বৈঠকতো নেকিবুৰ জামানে সৰৱ ভূমিকা গ্ৰহণ কৰে এইজন বৰ্ষীয়ান অধিবক্তাই হ’ব পাৰে ৰাজ্যৰ পৰৱৰ্তী মহাধিবক্তা অৱশ্যে পদ লাভৰ সম্ভাৱনা আছে বিজন মহাজনৰো৷ ৰাজ্যৰ অন্যতম প্ৰভাৱশালী অধিবক্তাজন বিজেপিৰো সদস্য৷ গতিকে তেৱোঁ শেষত ৰাজ্যৰ মহাধিবক্তা হোৱাৰ সম্ভাৱনা আছে৷ অৱশ্যে মহাজনে পেছাদাৰী কাৰণত এই পদ গ্ৰহণ কৰাৰ সম্ভাৱনা ক্ষীণ৷ গতিকে নেকিবুৰ জামানেই হৈছে সম্ভাৱ্য মহাধিবক্তা অৱশ্যে এই বিষয়ত আৰু একাধিক বিশ্লেষণৰ মনস্থ কৰিছে চৰকাৰী পক্ষই
0
