আগতীয়াকৈ সাৱধান হওক অসমৰ কুকুৰা পালক৷ ব্ৰইলাৰ ফাৰ্ম খুলি জীৱিকা উপাৰ্জন কৰি থকাসকল সতৰ্ক হওক৷ অন্যথা কিন্তু সৰ্বস্ব হেৰুৱাব পাৰে৷ কিয়নো দেশত আকৌ প্ৰাদুৰ্ভাৱ ঘটিছে বাৰ্ড ফ্লুৰ৷
দাক্ষিণাত্যৰ পৰা সমগ্ৰ দেশজুৰি বিয়পিছে এবিধ অচিন বেমাৰ৷ বিশেষকৈ অন্ধ্ৰপ্ৰদেশত বাৰ্ড ফ্লুৰ দৰে ৰোগবিধে ছানি ধৰিছে কুকুৰা ফাৰ্ম৷ এসপ্তাহৰ ভিতৰত ৰাজ্যখনত ৪ লাখ কুকুৰা মৰিছে৷ ৰোগ বিয়পা বন্ধ কৰিবলৈ বৰ্তমান অৱশিষ্ট বেমাৰী মুৰ্গীও চৰকাৰে হত্যা কৰি পুতি পেলাইছে৷
এইবিধ ৰোগ পিছে ধৰিব পৰা নাই পশুপালন বিভাগে৷ অন্ধ্ৰপ্ৰদেশৰ পৰা সৰবৰাহ কৰা কুকুৰাৰ জৰিয়তে সংক্ৰমিত হৈ তামিলনাডুতো বিয়পিছে ৰোগবিধ৷ দক্ষিণ ভাৰতৰ প্ৰতিখন ৰাজ্যতে বেমাৰৰ লক্ষণ অবিহনে কুকুৰা মৰাৰ বাবে শংকিত হৈ পৰিছে পালক৷
কিন্তু অসমৰ চাহিদা পূৰণ কৰিবলৈ দক্ষিণ ভাৰতৰ পৰাই আহি আছে ব্ৰইলাৰ৷ অচিন বেমাৰৰ বিষয়ে প্ৰচাৰিত হোৱাৰ পিছতো কুকুৰা সৰবৰাহ বন্ধ কৰা নাই চৰকাৰে৷
এতেকে ৰাজ্যৰ থলুৱা কুকুৰা পালকৰ বাবে বিপদসংকুল হৈ পৰিছে পৰিস্থিতি৷ পূৰ্বে অসমত বৰ্হিৰাজ্যৰ পৰাই বাৰ্ড ফ্লু সংক্ৰমিত হৈছিল৷ গাহৰি জ্বৰো আন ঠাইৰ পৰাই অসমলৈ বিয়পিছিল৷
গতিকে এইবাৰ আগতীয়াকৈ সাৱধান হ’ব লাগিব অসমৰ কুকুৰা পালক৷ অন্যথা পিছে ভয়ংকৰ হৈ পৰিব পাৰে পৰিস্থিতি৷
0
