অৰবিন্দ কেজৰিৱালৰ অশ্বমেধৰ ঘোঁৰা বন্দী কৰিলে নৰেন্দ্ৰ মোদীয়ে৷ যোৱা প্ৰায় ১২ বছৰে দৌৰি থকা আপৰ তেজী ঘোঁৰাটো শেষত বিজেপিৰ আস্তাবলত বান্ধ খালে৷ কিন্তু বিজেপিৰ বিজয় হৈছে জনশক্তিৰ বিজয়৷ এই দাবী কৰিলে প্ৰধানমন্ত্ৰীয়ে৷ দিল্লী বিজেপিয়ে দখল কৰাৰ পিছত উৎফুল্লিত মোদীয়ে দিলে একাধিক প্ৰতিশ্ৰুতি৷ কিন্তু কেজৰিৱালৰ পতনৰ পিছত আকৌ নিশ্চিত হ’ল বিজেপিৰ উত্থান৷ লোকসভা নিৰ্বাচনত শক্তি হ্ৰাস হোৱাৰ পিছত বিজেপিৰ শক্তি আকৌ বৃদ্ধি কৰিছিল হাৰিয়ানাৰ বিজয়ে৷ ক্ৰমাগতভাৱে মহাৰাষ্ট্ৰও দখল কৰি বিজেপিয়ে দিছিল উত্থানৰ ইংগিত৷ দেশত যে এতিয়াও প্ৰতিষ্ঠানবিৰোধী ঢৌ শক্তিশালী হোৱা নাই সেয়াই প্ৰণাম কৰি নৰেন্দ্ৰ মোদীয়ে একক প্ৰচাৰেৰে ভাঙি পেলালে কেজৰিৱালৰ দুৰ্গ৷
আনহাতে দিল্লীৰ নিৰ্বাচনে শেষ কৰি পেলালে কংগ্ৰেছক৷ প্ৰমাণিত হ’ল- কংগ্ৰেছ এতিয়া দেশৰ ৰাজনীতিত প্ৰাসংগিকতাহীন শক্তি৷ ৰাজনৈতিক প্ৰাসংগিকতা থাকিলেও কংগ্ৰেছৰ শক্তি ভোটাৰৰ মনত নাই৷ এয়াই প্ৰতিপন্ন কৰি এতিয়ালৈ দিল্লীত এটাও সমষ্টি কংগ্ৰেছে জিকিব পৰা নাই৷ ৰাহুল গান্ধীৰ কষ্টও বিফল হৈছে দিল্লীত৷
0
