প্ৰথমে আছিল ৯২৫ কোটি টকা, তাৰ পিছত হ’লগৈ ৬২৫ কোটি, তৃতীয় পক্ষই আকৌ কামটো ৩২৫ কোটি টকাতে কৰিবলৈ সৈমান হ’ল৷ কিন্তু তাৰ পিছতে বন্ধ হৈ গ’ল কামবোৰ৷ আমি ক’বলৈ ওলাইছো নিমাতী-মাজুলী সংযোগী ৮ কিলোমিটাৰ দীঘল দলংখনৰ কথা৷ প্ৰথমে দলংখন সাজিবলৈ ইউ পি ষ্টেট ব্ৰীজ কৰ্প’ৰেশ্যন লিমিটেডক ঠিকা দিছিল চৰকাৰে৷ এই প্ৰতিষ্ঠানটোৱে ৯২৫ কোটি টকাৰ বিনিময়ত দলং সাজিবলৈ দায়িত্ব লৈছিল৷ কিন্তু ইউ পি ষ্টেট ব্ৰীজ কৰ্প’ৰেশ্যন লিমিটেডে দ্বিতীয়টো প্ৰতিষ্ঠানক ছাব-কনট্ৰেক্ট দিলে৷ অৰ্থাৎ উপ-ঠিকা দি ইউ পি ষ্টেট ব্ৰীজ কৰ্প’ৰেশ্যন লিমিটেডে কামৰ পৰা মূৰ পোলোকা মাৰিলে৷ কিন্তু ইউ পি ষ্টেট ব্ৰীজ কৰ্প’ৰেশ্যন লিমিটেডৰ পৰা কামটো লোৱাৰ বিনিময়ত দ্বিতীয়টো পক্ষই পালে ৬২৫ কোটি টকা৷ অৰ্থাৎ দেখদেখকৈ ৩০০ কোটি কমিল৷ শেষত দ্বিতীয়টো পক্ষই আকৌ ব্ৰদী ৰায় এণ্ড কোম্পানীক দলংখনৰ উপ-ঠিকা দিলে৷ এইবাৰো দ্বিতীয় পক্ষই খালে ৩০০ কোটি৷ তেওঁলোকে দ্বিতীয় পক্ষক ৩২৫ কোটি টকাত দলংখন সাজিবলৈ দায়িত্ব দিলে৷ অৰ্থাৎ প্ৰমাণিত হ’ল- ৩২৫ কোটি টকাতে দলংখন নিৰ্মাণ সম্ভৱ আছিল৷ কিন্তু চৰকাৰে ৯২৫ কোটি টকাৰ নিবিদা আহ্বান কৰিছিল৷ কিন্তু ৭২টা খুঁটাৰ দলংখনৰ কাম বৰ্তমান সমুদায় বন্ধ হৈ আছে. পূৰ্বৰ নিবিদাও বাতিল কৰিছে চৰকাৰে৷ সেয়ে অতিষ্ঠ হৈ মাজুলীবাসীয়ে আৰম্ভ কৰিছে প্ৰতিবাদ৷ আজি মাজুলীত আছুৰ উদ্যোগত আয়োজন কৰা হৈছে মানৱ শৃংখল৷ নদীদ্বীপৰ অজস্ৰ লোকে মানৱ শৃংখল কৰি দলঙৰ কাম সম্পূৰ্ণ কৰিবলৈ দাবী উত্থাপন কৰিব৷ ইতিমধ্যে মাজুলীত আৰম্ভ হৈছে কাৰ্যক্ৰম৷
0
