সমাগত নিৰ্বাচনৰ লক্ষ্যৰে প্ৰগতি যাত্ৰা অনুষ্ঠিত কৰিছে, পিছে পুনৰ সন্দেহৰ সূত্ৰপাত কৰিছে নীতিশ কুমাৰৰ স্থিতিয়ে৷ সঘনাই পক্ষ সলনি কৰা বিহাৰৰ মুখ্যমন্ত্ৰীৰ ৰহস্যজনক মৌনতা বিজেপিৰ বাবে হৈ পৰিছে সংশয়ৰ কাৰণ৷
বিশেষকৈ নীতিশক লৈ অমিত শ্বাহে গ্ৰহণ কৰা স্থিতিৰ বাবে সন্দেহ ঘনীভূত হৈছে৷ অহা বছৰৰ আৰম্ভণিতে বিহাৰত অনুষ্ঠিতব্য নিৰ্বাচনৰ পূৰ্বে নীতিশৰ সৈতে ঘনিষ্ঠতা বৃদ্ধি পাইছে লালুপ্ৰসাদ যাদৱৰো৷
নিৰ্ণায়ক সময়তে নীতিশে বিহাৰত আৰম্ভ কৰিছে প্ৰগতি যাত্ৰা৷ নিৰ্বাচনৰ পূৰ্বে জনসংযোগৰ উদ্দেশ্যে আৰম্ভ কৰা কাৰ্যসূচীৰে জনতা দল ইউনাইটেডৰ নেতাজনে দিছে অকলশৰীয়াকৈ ভোটযুদ্ধত অৱৰ্তীণ হোৱাৰ ইংগিত৷ আনহাতে শেহতীয়াকৈ অমিত শ্বাহে বিহাৰৰ নিৰ্বাচনৰ পূৰ্বে এন ডি এৰ মুখ্যমন্ত্ৰী পদৰ প্ৰাৰ্থী বাছনি কৰা হ’ব বুলি ঘোষণা কৰিছিল৷
অৰ্থাৎ নীতিশক যে আকৌ পদবী প্ৰদান কৰা নহয় সেয়া গৃহমন্ত্ৰীয়ে নিশ্চিত কৰিছে৷ তাৰ পিছতে বিহাৰ বিজেপিৰ অধ্যক্ষ দিলীপ জয়ছোৱাল আৰু উপ-মুখ্যমন্ত্ৰী সম্ৰাট চৌধুৰীয়ে কিন্তু নীৰৱতা অৱলম্বন কৰিলে৷ কিন্তু বৰ্তমান মহাত্মা গান্ধীৰ কৰ্মস্থলী পশ্চিম চম্পাৰণ জিলাৰ পৰা প্ৰগতি যাত্ৰা আৰম্ভ কৰিছে নীতিশে৷
ভ্ৰমণৰ সময়ত তেওঁ শিলান্যাস কৰিছে কেবা কোটিটকাৰ প্ৰকল্পৰ৷ অৰ্থাৎ পুনৰ অকলশৰে নিৰ্বাচন খেলিবলৈ নীতিশে শক্তি সঞ্চয় কৰিছে৷ একেসময়তে আকৌ তেজস্বী যাদৱৰ সৈতে নীতিশৰ গোপন মিত্ৰতাৰ খবৰ দিছে জে ডি ইউৰ নেতৃত্বই৷
সম্ভেদ অনুযায়ী মহাৰাষ্ট্ৰত একনাথ সিন্দেক বিজেপিয়ে মুখ্যমন্ত্ৰী পদৰ পৰা আঁতৰোৱাৰ বাবে সন্ত্ৰস্ত হৈ পৰিছে বিহাৰী বাবু৷ সেয়ে তেওঁ অহা নিৰ্বাচনৰ পূৰ্বে বিজেপিক বিশ্বাস কৰিব নোৱাৰা হৈছে৷ এতেকে আকৌ পক্ষ সলনিৰ বাবে প্ৰস্তুত হৈছে পাল্টুৰাম বুলি পৰিচিত নেতাজন৷
0
