বৰযাত্ৰীৰ গাড়ীলৈ শিল দলিওৱা গেঙে ত্ৰাসৰ সৃষ্টি কৰিছে উজনিত৷ বিয়াৰ বতৰত গাড়ীলৈ শিল দলিয়াই সেই দলটোৱে আতংকৰ সৃষ্টি কৰিছে৷
বিশেষকৈ শিৱসাগৰত বৰযাত্ৰীৰ গাড়ীলৈ নিশা শিল দলিওৱাটো স্বাভাৱিক ঘটনা হৈ পৰিছে৷ শেহতীয়াকৈ সংঘটিত এনে ঘটনাত আহত হৈছে কেবাজনো লোক৷
খবৰ অনুযায়ী শিৱসাগৰৰ ডিমৌত এদল বৰযাত্ৰী দুৰ্বৃত্তৰ আক্ৰমণৰ সন্মুখীন হৈছিল৷ ডিব্ৰুগড়ৰ পৰা যোৱা দলটোৰ গাড়ীলৈ শিল দলিয়াইছিল দুৰ্বৃত্তই৷ সেই ঘটনাত গাড়ী ধ্বংস হোৱাৰ উপৰি আহত হৈছে ১৪ জন লোক৷
একেদৰে যোৰহাটৰ ৬ ঠাইত ঘটিছে শিল দলিওৱাৰ ঘটনা৷ এই ঘটনাৰ সৈতে জড়িত যুৱক নিচাসক্ত বুলি সন্দেহ কৰা হৈছে৷ যোৰহাট বাইপাছতো শেহতীয়াকৈ এদল বৰযাত্ৰী শিল আক্ৰমণৰ সন্মুখীন হৈছে৷
আনহাতে গোলাঘাটত নিশা ওভতনিৰ সময়ত আক্ৰমণৰ সন্মুখীন হৈছে এদল বৰযাত্ৰী৷ তেওঁলোকৰ ভিতৰৰ ২০ জনে হাত আৰু মূৰত আঘাত পাইছে৷
এনে ঘটনাৰ পৰিপ্ৰেক্ষিততে বৰযাত্ৰীৰ ভাৰা মাৰিবলৈ ভয় কৰা হৈছে গাড়ীৰ মালিকে৷ ড্ৰাগছ আসক্তই সংঘটিত কৰা আক্ৰমণে ভয় লগা কৰি তুলিছে কইনা আনিবলৈ যোৱা পৰ্ব৷
