কোন এই কৰিশ্মা হাজৰিকা?
চিনি নাপাই যদি শুনক,
কেটৰিনা কাঈফ অথবা জেকুলিন ফাৰ্নাণ্ডেজকে ধৰি বহু নায়িকাই যেতিয়া বলীউডত খোপনি পুতিবলৈ সংগ্ৰাম কৰি আছিল তেতিয়া কোনেও সহায় কৰা নাছিল তেওঁলোকক৷
কিন্তু তেওঁলোকক আঙুলিত ধৰি সহায় কৰিছিল ছলমান খানে৷ বলীউডৰ কেবাগৰাকী অভিনেত্ৰীৰে গডফাডাৰ হিচাপে জনা যায় ছল্লুভাইক৷
গতিকে সম্ভৱত: ছলমানৰ বাবেই অসমৰ এগৰাকী সুন্দৰীৰো প্ৰৱেশ ঘটিব মুম্বাইৰ মায়াজগতত৷
ফটোখনত ডিঙিত গামোচা লৈ থিয় হৈ আছিল ছলমান খান, কাষতে ৰৈ আছিল এগৰাকী যুৱতী৷ সুন্দৰী যুৱতীগৰাকীৰে নাম হৈছে কৰিশ্মা হাজৰিকা৷ যোৱা কিছুদিন সামাজিক মাধ্যমত ভাইৰেল হৈ পৰিছে বিশেষ ফটোখন৷ প্ৰথমে ফটোখন ফটোশ্বপত এডিট কৰা বুলিও বহুতে সন্দেহ কৰিছিল৷ কিন্তু লাহে লাহে সন্দেহ নিৰসন হ’ল৷ তাৰ পিছত উদ্ধাৰ হ’ল যুৱতীগৰাকীৰ পৰিচয়৷
অসমৰ যুৱতীগৰাকী বৰ্তমান মডেলিঙৰ জগতত ব্যস্ত৷ মিছ ইণ্ডিয়া ছুপাৰ মডেল হাণ্ট, মিছ ইণ্ডিয়া ম’ষ্ট এট্ৰাক্টিভ আইজ, মিছ ডিৱা অসম আদিৰ বিজয় মুকুট কৰিশ্মাই ইতিমধ্যে পৰিধান কৰিছে৷
অপৰূপা কৰিশ্মা অভিনয়ৰ বাবেও আগ্ৰহী৷ বলীউডত আত্মপ্ৰকাশৰ বাবে কৰিশ্মাই চেষ্টা কৰিছে৷ দেশৰ আগশাৰীৰ অভিনেত্ৰীসকলৰ দৰে হিন্দী ছবিৰ নায়িকা হ’বলৈ কষ্ট কৰিছে কৰিশ্মাই৷
শেহতীয়াকৈ তেওঁ লাভ কৰিছিল ছলমান খানক সাক্ষাতৰ সুযোগ৷ ছলমানৰ গাতে গা লগাই ফটোও উঠাৰ সুবিধা পালে কৰিশ্মাই৷
তাৰ পিছতে কৰিশ্মা হৈ পৰিছে চৰ্চাৰ বিষয়৷ বলীউডত আত্মপ্ৰকাশ কৰিবলৈ অপেক্ষা কৰি থকা কৰিশ্মাক লৈ সকলো ব্যস্ত হৈ পৰিছে৷
বিশেষকৈ ছলমানৰ সৈতে তেওঁৰ অন্তৰংগ আলাপ হৈ পৰিছে আলোচনাৰ বিষয়৷ ছুপাৰষ্টাৰ ছলমানৰ ফাৰ্ম হাউছক বলীউডৰ প্ৰৱেশদ্বাৰ বুলিও অভিহিত কৰিছে বহুতে৷ বলীউডৰ ছল্লুভাইৰ সৈতে কথা পতাৰ সুযোগ পোৱাৰ পিছতে কৰিশ্মাক বলীউডৰ নায়িকাৰ সৈতেই তুলনা কৰিছে চিনেমা অনুৰাগীয়ে৷
